काठमाडौँ । विवाहको लोभ देखाएर बङ्गलादेशी युवतीको तस्करी गर्ने कार्यमा चिनियाँ गिरोह सक्रिय रहेको पाइएको छ । पछिल्लो समय भारतीय बाटो हुँदै बंगलादेशी युवतीलाई नेपाल ल्याएर चिनियाँहरुले तस्करी गर्ने गरेको पाइएको हो ।
भारत र नेपालबीचको खुला सिमानाको फाइदा उठाउँदै चिनियाँहरुले नेपालको बाटो हुँदै बंगलादेशी युवतीहरुको तस्करी गर्ने गरेको प्रहरीले जनाएको छ ।
गत सातामात्रै त्रिभुवन अन्तराष्ट्रिय विमानस्थलको अध्यागमन कार्यालयले चीन जान लागेका तीन जना (रिहाना अक्तर रानु, मिनुचिङ मर्मा र अप्रुमा मर्मा) बंगलादेशी युवतीलाई विमानस्थलमै रोकेको थियो । कार्यालयले उनीहरुको यात्रा शङ्कास्पद देखिएको भन्दै प्रस्थान अनुमति दिन स्वीकार गरेको थियो ।
सोही क्रममा उनीहरुको पक्षमा बोलिरहेका एकजना चिनियाँ नागरिकले उनीहरुको श्रीमान् चीनमै बस्ने र आफूले उनीहरुलाई श्रीमान्सम्म पुर्याइदिने बताएका थिए ।
तर, कागजपत्र नै शंकास्पद देखेपछि अध्यागमन कार्यालयले ती युवतीहरुलाई प्रस्थान अनुमति दिन मानेन । पछि अनुसन्धान गर्दै जाँदा उनीहरुलाई भारतीय नाका हुँदै नेपाल ल्याएर चीन तस्करी गर्न लागेको पाइएको स्रोतले बताएको छ । यसअघि पनि चिनियाँ नागरिकले विवाहको लोभ देखाएर नेपाली युवतीलाई तस्करी गरेका घटना सार्वजनिक भएका थिए । यसले पनि नेपाल, बंगलादेश र भारतबाट युवतीहरुलाई विवाहको लोभ देखाएर तस्करी गर्ने कार्यमा चिनियाँहरु सक्रिय रहेको तथ्यलाई थप बल दिएको छ ।
पछिल्ला दिन यसरी चिनियाँ नागरिकले विवाहको लोभ देखाएर युवतीहरुको तस्करी गर्ने क्रम बढेपछि विमानस्थलमा निगरानी बढाइएको छ ।
