काठमाडौँ । कुमारी बैंकको १९ करोड किर्ते काण्डमा मुछिएका बैंकका डेपुटी सिइओ मनिस तिमिल्सिना र अनुजमणि तिमिल्सीनालाई बैंकले बिदा गर्ने निर्णय गरेको छ । बैंकको संचालक समितिले भिआरएस दिएर उनीहरुलाई बैंकबाट बिदा गर्ने निर्णय गरेको हो ।
`कुमारी बैंकको किर्ते काण्डमा मनिसजीले बैंकलाई धोका दिएको थाहा पाएलगत्तै उनलाई बैंकबाट निकाल्नुपर्ने सल्लाह भई नै रहेको थियो । अन्तत उहाँलाई भिआरएस दिएर बैंकबाट बिदा गर्ने निर्णय भयो ।´ अर्थ सरोकारसँग कुराकानी गर्दै बैंकका एक संचालकले भने-`अनुजजी र मनिसजी आजैबाट कुमारीमा रहनुहुन्न । रामचन्द्र खनाललाई कामु सीइओ बनाउने निर्णय गरिसकेका छौं। ´
मनिस तिमिल्सीना र अनुजमणि तिमिल्सीना कुमारीमा हुँदादेखि नै विवादित छवि भएका व्यक्ति हुन् । जग्गाको कागज नक्कली छ भन्ने जान्दाजान्दै उनीहरुले मिलेमतोमा १९ करोड ऋण प्रवाह गर्न फाइल सदर गरेका थिए ।
कुमारी बैंकमा भएको १९ करोडको ऋण काण्डमा अर्थ सरोकारले विशेष सिरिजनै सार्वजनिक गरेको थियो । बैंकको किर्ते काण्डमा बैंककै सीइओ र डेपुटी सीइओको मिलेमतोको संकेत देखिएकोबारे अर्थ सरोकारले विशेष सामाग्रीहरु प्रकाशन गर्दै आएको थियो ।
