काठमाडौँ । धेरैपछि सेयर बजारमा उछाल देखिएको छ । धेरै दिनको उदेकलाग्दो घटाईपछि आइतबार सेयर लगानीकर्ताहरुले आनन्दको स्वास फेर्न पाएका छन् । तर धेरैको प्रश्न छ-‘के बजारको यो बढोत्तरी टिक्ला ? प्राविधिक रुपमा बजार कता जाँदैछ ? अवको बजार यात्रा बुलको हो ? वा आजको बढोत्तरीमा हौसिहाल्नुपर्ने केहि छैन ? आखिर के हो त बजारको अवको पाटो ? कता हो त बजारको अवको बाटो ?

प्राविधिक विश्लेषक अजय सिंह थापा (जय सम्भो) बजारमा केहि सकारात्मक समाचार आउने थाहा पाएपछि धेरै लगानीकर्ता बजारमा सेयर किन्न हौसिएको हुन सक्ने बताउँछन् । ‘आजको बजारबाट लगानीकर्ताहरुले भविष्यमा आउने केहि गुडन्युजलाई रिएक्सन गरेको हुन सक्छ । बजारमा केहि राम्रा समाचार आउंदैछन् र ती समाचार आउने थाहा पाएर बजारमा लगानीकर्ताहरु प्रवेश गरेको हुन सक्ने देखिन्छ ।’ विश्लेषक थापा भन्छन्- ‘होइन भने अहिलेको सेन्टिमेन्टले यतिको बजार बढ्नु सामान्यचाहिं होइन ।’

उनका अनुसार आइतबारको बजार बढोत्तरीलाई सकारात्मक रुपमा नै लिन सकिने अवस्था हो । ‘हामीले आइतबारको बजारलाई सकारात्मक रुपमा नै बुझ्दा हुन्छ।  यसलाई नै अहिले नै धेरै  ठूलो विश्लेषणचाहिँ गर्नुपर्दैन । तर भोलि मर्केटले अझै फलोअप गर्यो भने स्थिति के भन्ने ठ्याक्कै कन्फरमेसन हुन्छ । २/४ दिनमा केहि राम्रो समाचार आउला,  मौद्रिक नीतिमा केहि राम्रो आउला अथवा अर्थमन्त्रालयबाट केहि राम्रो खबर आउने भएका कारण पनि बजार बढेको हुनसक्छ ।’

थापाका अनुसार अहिले कतिको रेकर्ड ब्रेक हुन्छ वा हुँदैन भन्दा पनि ट्रेडरले २२६० सम्मको टार्गेट राख्न सक्ने स्थिति छ । ‘२२६० भन्दा अगाडी २११५ को विन्दुलाई पनि सोचेर अगाडी बढ्न सकिन्छ । जस्तै, आज ट्रेड लिइएको छ भने त्यसलाई ब्रेक नगरे पनि एक तहसम्म नाफा गर्न सकिन्छ ।’ उनका अनुसार प्राविधिक रुपमा अवको बजारलाई दुई तरिकाले हेर्न सकिन्छ। ‘अव बजार हेर्दा २२६० सम्मको टार्गेट लिएर बस्न सकिन्छ । अव हामीलाई चाहिँ कस्तो हुन्छ भने त्यहाँसम्म बजार गएपछि बजारमा नयाँ जानकारी आउँछ । जस्तो- राष्ट्र बैंकको नयाँ तथ्यांकहरु आउन सक्छन्, मौद्रिक नीति नयाँ आउँछ । त्यसले बजारमा केहि न केहि प्रभाव पार्ने नै हुन्छ । तर यति तलसम्म आईसकेको बजारमा केहि समयका लागि अवस्था सकारात्मक नै छ ।