काठमाडौँ । नेपाली कांग्रेसका सभापति एवं पूर्वप्रधानमन्त्री शेरबहादुर देउवा र नेपाल भ्रमणमा रहेका भारतीय विदेश मन्त्री डा. एस जयशङ्करबीच भेटवार्ता भएको छ ।
भेटमा पूर्वप्रधानमन्त्री देउवा र जयशंकरबीच द्विपक्षीय आपसी हितका विविध सम्बन्धमा छलफल भएको कांग्रेस पार्टी कार्यालयले जनाएको छ । भेटमा दुई देशबीच सदियौँदेखिको सम्बन्ध र घनिष्ठ सम्बन्धलाई थप प्रगाढ बनाउने र नेपालको विकास निर्माणमा सहयोग अभिवृद्धि गर्नेलगायत विषयमा छलफल भएको कांग्रेस मुख्यसचिव कृष्णप्रसाद पौडेलले जानकारी दिएका छन् ।
भारतीय विदेश मन्त्री डा. जयशङ्कर नेपाल–भारत संयुक्त आयोगको बैठकमा भाग लिन पुष १९ गते नेपाल आएका थिए । उनले भ्रमणका क्रममा राष्ट्रपति रामचन्द्र पौडेल र प्रधानमन्त्री पुष्पकमल दाहाल (प्रचण्ड) सँग छुट्टाछुट्टै शिष्टाचार भेटवार्ता गरेका छन् । उनी भ्रमण सम्पन्न गरी पुस २० गते स्वदेश फर्कनेछन् ।
