काठमाडौँ । सांसद लेखनाथ दाहालले विपन्न नागरिकको मात्रै स्वास्थ्य उपचार गर्ने किसिमको विपन्न नागरिक अस्पताल स्थापना गर्न माग गरेका छन् । बुधबार प्रतिनिधि सभाको बैठकमा सांसद दाहालले यस्तो माग गरेका हुन् ।
उनले विपन्न नागरिकको अस्पतालमा पहुँच नरहेको बताउँदै सरकारी अस्पतालमासमेत सुविधासम्पन्नकै पहुँच रहेकोले विपन्नले मात्र स्वास्थ्य सेवा पाउने गरी छुट्टै अस्पताल स्थापना गर्न आवश्यक रहेको बताएका छन् ।
‘सरकारी अस्पताल सम्पन्न र पहुँचवालाका मात्र भएका छन् । सरकारी अस्पतालभित्रै विपन्नको पहुँच छैन । विपन्नले बेड, आइसीयु र भेन्टिलेटर पाउँदैन ।’, सांसद दाहालले भने, ‘विपन्न व्यक्तिलाई गरिबी परिचयपत्र वितरण गर्ने र उनीहरुका लागि निःशुल्क उपचार दिनेगरी विपन्न नागरिक अस्पताल खोल्न सरकारको ध्यानाकर्षण गराउँछु ।’
त्यस्तै, सांसद दाहालले क्यान्सर लगायतका रोगले आम जनतामा गम्भीर असर परेको बताएका छन् । उनले सरकारले सबैभन्दा पहिलो नागरिकको स्वास्थ्यप्रति गम्भीर हुन सरकारसँग आग्रह गरेका छन् ।
