काठमाडौँ । सौर्य एयरलाइन्सको जहाज दुर्घटनामा ज्यान गुमाएकाहरुको पोस्टमार्टम आजै (बुधबार) हुने भएको छ । जहाजमा सवार १९ मध्ये मृत्यु भएका १८ जनाको पोस्टमार्टम आजै हुने भएको हो ।

सबै मृतकको शव घटनास्थलबाट उद्धार गरी त्रिभुवन विश्वविद्यालय शिक्षण अस्पताल पुर्याइएको छ । मृतकको पोस्टमार्टमका लागि तयारी सुरु गरिसकेको अस्पताल स्रोतले जनाएको छ । पोस्मार्टमका लागि अस्पतालले प्राविधिक जनशक्तिलाई तत्काल अस्पताल आउन खबर गरिसकेको छ ।

पोस्टमार्टम २ घण्टापछि सुरु हुनेछ । पोस्टमार्टम सकेर तीन दिनपछि मात्र शव आफन्तको जिम्मा लगाइने अस्पताल स्रोतले बताएको छ ।

दुर्घटनामा परेको जहाजमा १९ जनामध्ये जहाजका क्याप्टेन ३७ वर्षीय मनिष शाक्यको केएमसी अस्पतालको आईसीयूमा उपचार भइरहेको छ । उनको टाउकोमा चोट लागेको भए पनि अवस्था खतरामुक्त रहेको अस्पतालले जनाएको छ । बुधबार बिहान करिब ११ बजे काठमाडौँदेखि पोखरा जाने क्रममा विमानस्थलबाट ‘टेक अफ’ गर्ने बित्तिकै सौर्य एयरलाइन्सको जहाज दुर्घटनामा परेको थियो ।