काठमाडौँ – नेकपा(माओवादी केन्द्र)का अध्यक्ष प्रचण्ड नेतृत्वको सरकारमा जाने कि नजाने भन्ने विवादका कारण समस्यामा फसेको राप्रपा नेपाल र त्यसका अध्यक्ष कमल थापा राप्रपा एकतामा नआउने भएपछि त्यसका केही नेता चोर्ने अभियानमा लागेका छन् ।

उनले पूर्वप्रधानमन्त्री एवम् राप्रपाका पूर्वअध्यक्ष लोकेन्द्रबहादुर चन्दालाई सर्वमान्य नेता बनाएर पार्टीमा स्थान दिन लागेको भन्दै पटक–पटक खबर पठाएका छन् । राप्रपा नेपालका अध्यक्ष कमल थापाले आफ्नै सहयोगी समेत रहेका सहप्रवक्ता मोहन श्रेष्ठलाई सोही सन्देश पठाएर तीन पटक नेता चन्दसँग भेटवार्ता गरिसकेको बताइन्छ ।

थापाले चन्दलाई सर्वमान्य नेता बनाउने प्रस्ताव गरेका छन्, उनको प्रस्तावलाई शिरोधार्य गरेको खण्डमा लोकेन्द्रबहादुर चन्द र उनका छोरा जयन्त चन्द राप्रपा नेपालमा प्रवेश गर्न सक्छन्, स्रोतले भन्यो । चन्दलाई थापाले अरु केही आश्वासन समेत दिएको बुझिएको छ ।

तर पशुपति शमसेर राणा, डा. प्रकाशचन्द लोहनीलगायतका नेताले कमल थापामाथि पर्ने गरी आएको एकता प्रस्ताव आफूहरुले अस्वीकार गरेको बताउँदै आएका छन् । थापा चाहिँ कार्यकारी अध्यक्ष बन्ने र राप्रपाका नेता चाही राष्ट्रिय अध्यक्ष बन्ने प्रस्ताव जालझेलपूर्ण र धोकाधडीको प्रस्ताव रहेको राप्रपाका नेताहरुले सार्वजनिक रुपमा नै बताउँदै आएका छन् ।

थापाले पूर्ण रुपमा जालझेल गरेर राप्रपालाई आफ्नो पार्टीमा मिसाइहाल्ने र पछि विरोध गर्नेलाई व्यक्ति छानी छानीकन कारवाही गर्ने र ठेगान लगाउने लक्ष्य राखेका हुन् । तर पछिल्लो पटक थापाको सो उद्देश्यले भने साकार रुप लिन पाएन । किनकी राजनीतिमा पनि तुरुपा लाग्यो र राप्रपाले दुई मन्त्री सहित वर्तमान सरकारमा सहभागी हुने अवसर पायो । आजको जनआह्वान साप्ताहिकमा खबर छ ।