काठमाडौँ – सर्लाही घर भएका जितेन्द्र ठाकुर कोटेश्वरमा शनिबार साँझ नागको तस्विर बेच्नमै ब्यस्त थिए । आइतबार रहेको नाग पंचमीका लागि नाग किन्नेहरुकै पनि उस्तै भीड । यो ‘सिजान’ को व्यापारबाट उनी निकै सन्तुष्ट छन् । नहुन् पनि किन, २५ पैसामा किनेर ल्याएको तस्विर २५ रुपैयाँमा बेचे उनले ।

उनका अनुसार उनले भारतबाट नागको तस्विर ल्याएका हुन् । ‘काठमाडौँसम्म आइपुग्दा यो नागको तस्विरको हाम्रो मूल्य २५ पैसाबाट एक रुपैयाँसम्म पर्छ । हेरी हेरी नागको तस्विर किन्न पाइन्छ । २५ पैसा पर्ने नागको तस्विर औसतमा २५ रुपैयाँमा बेच्ने गरेको छु । कतिले बार्गेनिङ गरेर २० रुपैयाँसम्म लागेका छन् । अब अलि अबेर भयो भनेचाहिं १० रुपैयाँसम्म बेच्छु।  किनकि अब यो भोलि व्यापार कम हुन्छ । पर्सिदेखि त कसैले पनि किन्दैन ।’

उनीजस्तै भारतबाट ल्याएर नेपालमा नागको तस्विर बेच्ने धेरै छन् ।

प्रत्येक वर्ष साउन शुक्ल पञ्चमीका दिन मनाइने नागपञ्चमी पर्व आज परम्पराअनुसार घरका मूलढोकामा नागको चित्र टाँसी पूजाअर्चना गरेर मनाइँदैछ ।  आजको दिन घरका ढोकामा नागको चित्र टाँसी पूजा गर्नाले चट्याङ र आगलागीका साथै सर्प, बिच्छीलगायत विषयुक्त जीवबाट रक्षा गर्ने शास्त्रीय मान्यता रहेको नेपाल पञ्चाङ्ग निर्णायक समितिका अध्यक्ष प्रा डा रामचन्द्र गौतमले अर्थ सरोकार डटककमलाइ बताए ।

नागपञ्चमीका दिन बिहान सबेरै पुरोहितद्वारा नागको पूजा गरेर घरको मूलद्वारमा नागको चित्र टाँसी घरधनीले पनि नागपूजा गर्ने शास्त्रीय परम्परा छ । आजका दिन आफ्ना कुलनागका थानमा पनि विशेष रूपमा पूजा गरी खीर, रोटीलगायतका प्रसाद चढाउने गरिन्छ । यस उपलक्ष्यमा पशुपतिको वासुकी, नागपोखरी, टौदहलगायतका स्थानमा मेला लाग्नेगर्दछ ।