प्रधानमन्त्री चयनका लागि व्यवस्थापिका संसदको बैठक सुरु भएको छ । आजको संसद बैठकले मुलुकको ३८ औं प्रधानमन्त्रीको चयन गर्नेछ । प्रधानमन्त्रीको उम्मेदवारको रुपमा एमाले अध्यक्ष केपी ओली र कांग्रेस सभापति सुशील कोइराला रहेका छन् ।
एमालेका अध्यक्ष केपी शर्मा ओलीले नेपालको सविधानको धारा २९८ को उपधारा ३ एवम् व्यवस्थापिका–संसद्को अन्तरिम कार्यविधि, २०७२ को दफा १९को उपदफा ३ बमोजिम नेपालको प्रधानमन्त्री पदमा आफ्नो उम्मेदवारीको सूचना प्रस्तुत गर्नेछन् । नेता ओलीको उम्मेदवारीको प्रस्तावकमा एकीकृत नेकपा(माओवादी)का अध्यक्ष पुष्पकमल दाहाल प्रचण्डले र समर्थकमा राष्ट्रिय प्रजातन्त्र पार्टी नेपालका अध्यक्ष कमल थापालगायत १६ जनाले समर्थन गर्नेछन् ।
यस्तै, नेपालको सविधानको धारा २९८ को उपधारा ३ एवम् व्यवस्थापिका–संसद्को अन्तरिम कार्यविधि, २०७२ को दफा १९को उपदफा ३ बमोजिम नेपालको प्रधानमन्त्री पदमा नेपाली काँग्रेसका सभापति सुशील कोइरालाले प्रस्तुत गरेको उम्मेदवारीको सूचना प्रस्तुत गर्नेछन् । सभापति कोइरालाको उम्मेदवारीको प्रस्तावकमा काँग्रेस वरिष्ठ नेता शेरबहादुर देउवा र समर्थक उपसभापति रामचन्द्र पौडेलले समर्थन गर्नेछन् ।
यसअघि राष्ट्रपति कार्यालयबाट प्रधानमन्त्री सुशील कोइरालाले दिएको राजीनामा सम्बन्धी पत्र सभामुखले वाचन गरेर सुनाएका थिए । त्यस्तै सांसद् डा बाबुराम भट्टराईले संसद सदस्यबाट दिएको राजीनामा सम्बन्धी पत्र वाचन गरिएको थियो ।
