ठग्ने होइन, ठगिने दोषी । दसैँ–तिहारको उपलक्ष्यमा विशेष छुट भन्दै कतै तपाइँ पनि टेलिभिजन, रेफ्रिजेरेटर खरिद गर्दै त हुनुहुन्न ? उसो हो भने होस गर्नुहोस् है, नागेश्वर श्रेष्ठझैँ ठगिनुहोला ।

फोब्र्स पत्रिकाद्वारा नेपालको अर्बपति ठह¥याइएका विनोद चौधरीलाई सोही पत्रिकाले यसपटक विश्वकै दानीको सूचीमा समावेश गरेको छ । तर, तिनीद्वारा सञ्चालित कम्पनीले सर्वसाधारणलाई कसरी ठग्छन् भन्ने यो एउटा ज्वलन्त उदाहरण हो । वाइवाई चाउचाउका मालिक चौधरी गु्रपले एलजी ब्रान्डको टेलिभिजनसमेत बिक्री–वितरण गर्दै आएको छ ।

संतुगलमा फ्याक्ट्री रहेको एलजीको सोरुम कालिमाटीमा समेत छ । बल्खु घर भई वीर अस्पताल रक्तसञ्चार विभागमा कार्यरत कर्मचारी नागेश्वरले आकर्षक छुटमा एक वर्षअघि कालिमाटीस्थित सनराइज नेपाल इलेक्ट्रोनिक्स प्रालिबाट ४७ इञ्चको एलजी टिभी र एलजी वासिङ मेसिन गरी २ लाख ५६ हजारको सामान खरिद गरेका थिए । जसमध्ये टेलिभिजनको मूल्य एक लाख ७२ हजार पाँच सय ६६ रुपैयाँ थियो ।

त्यस्तै, उनले सोही डिलरबाट ५३ हजार ९ सय ८२ रूपैयाँको एलजी वासिङ मेसिन खरिद गर्दा २ वर्षको ग्यारेन्टी कार्डसमेत पाएका थिए । तर, केही महिना नबित्दै टिभी बिग्रियो । ठूलो रकम हालेर किनेको टेलिभिजन बिग्रँदा चिन्तित हुनु स्वाभाविकै थियो, कम्पनीमा फोन गरे । कम्पनीकै गाडीमा आएका केही कर्मचारीले घरबाट टिभी उठाएर लगे । एउटा सानो रसिद दिए । र, केही साताभित्रै बनाइदिने वचन पाए ।

यतिखेर उनको हातमा न टेलिभिजन छ न त पैसा । घरबाट उठाएर लगेको टेलिभिजन कम्पनीले बनाएर फिर्ता दिने त परको कुरा उल्टो के भइरहेछ भन्दै नागेश्वर सोध्न जान्छन् । कम्पनीका कर्मचारीले उल्टै धम्क्याउने र थर्काउने गर्ने गरेको गुनासो छ । यससम्बन्धमा निवेदन दर्ता गर्न गए । तर, उद्योगपति विनोद चौधरीविरुद्ध भन्दै प्रहरीले निवेदनै लिन अस्वीकार गरेको श्रेष्ठ गुनासो गर्छन् । यस विषयमा बुझ्न सनराइज नेपाल इलेक्ट्रोनिक्सका एमडीको मोबाइल नम्बर ९८०२०२२१६२ मा पटक–पटक सम्पर्क गर्दा उनी सम्पर्कमा आउन चाहेनन् भनेर जनआस्था साप्ताहिकले समाचार छापेको छ ।