नेपाल धर्मनिरपेक्ष मुलुक बन्ने निश्चित भएको छ । राष्ट्रिय प्रजातन्त्र पार्टी नेपालका अध्यक्ष कमल थापाले संविधानमा धर्मनिरपेक्षताको साटो हिन्दु राष्ट्र राख्नु पर्ने माग गर्दै गरेको संशोधन प्रस्तावलाई संविधान सभाको बहुमतले अस्वीकृत गरिदिएको छ ।

संविधानको धारा ४ मा रहेको नेपाल धर्म निरपेक्ष राष्ट्र रहने भन्ने कुरा संशोधन गर्न थापाले प्रस्ताव गरेका थिए । उनको प्रस्तावलाई सभाध्यक्ष सुवास नेम्वाङले निर्णथार्य प्रस्तुत गर्दा बहुमतले यो प्रस्ताव अस्वीकृत गरेको थियो ।

कुल ६१ जना सभासद् प्रस्तावको पक्षमा रहेको भए मतदानमा जान सकिने व्यवस्था बमोजिम सो प्रस्तावको पक्षमा २१ जना सभासद् मात्रै उठेकाले नेम्वाङले प्रस्ताव अस्वीकृत भएको घोषणा गरेका थिए ।

संविधानसभाको बैठकबाट संविधानको धारा ४ मा कांग्रेस एमाले र एमाओवादीले संयुक्त रूपमा राखेको संशोधन प्रस्ताव पारित भएको छ।