काठमाण्डु, २२ भदौ– उपप्रधानमन्त्री तथा गृहमन्त्री बामदेव गौतमले देशमा शान्ति सुरक्षा कायम गर्ने सन्दर्भमा कुनै सम्झौता नगरिने बताएका छन् ।

मंगलबार प्रहरी प्रधान कार्यालयमा आयोजित ‘वर्तमान अवस्थामा शान्ति–सुरक्षाको अवस्था एवं उत्पन्न चुनौती’ विषयक समिक्षा बैठकलाई सम्बोधन गर्दै उनले सो कुरा बताएका हुन् । सो बैठकमा महानगरीय प्रहरी कार्यालय र पाँचै क्षेत्रका प्रहरी प्रमुखहरुको सहभागिता रहेको थियो ।

बैठकमा गृहमन्त्री गौतमले हाल देखिएका विभिन्नखाले विकृतिलाई कारबाहीको दायराभित्र ल्याउनुपर्ने उल्लेख गर्दै सुरक्षा व्यवस्था थप सुदृढ गर्नुपर्ने बताए । उनले अपराध गर्न उक्साउने र सदभाव भड्काउनेलाई पक्राउ गर्न र चेकजाँच कार्यलाई अझै कडाईका साथ अगाडि बढाउन निर्देशनसमेत दिए ।

समीक्षा बैठकमा गृह प्रवक्ता सहसचिव लक्ष्मीप्रसाद ढकाल, प्रहरी अतिरिक्त महानिरिक्षकहरु, महानगरीय प्रहरी कार्यालय तथा पाँचै क्षेत्रका प्रहरी प्रमुखहरु एवं प्रहरी प्रधान कार्यालयस्थित वरिष्ठ प्रहरी अधिकृतहरुको सहभागिता रहेको श्रोतले बताएको छ ।

सो अवसरमा गृहसचिव सूर्यप्रसाद सिलवालले वर्तमान अवस्थामा शान्ति–सुरक्षा कायम गर्नकालागि सुरक्षा निकायले अझै सक्रियताकासाथ काम गर्र्नुपर्ने बताएका थिए ।

प्रहरी महानिरीक्षक उपेन्द्रकान्त अर्यालले शान्ति–सुरक्षा कायम गर्नका लागि प्रहरी जनशक्ति हरहमेशा फिल्डमा खटिन सक्ने गरी तयारी हालतमा रहेको जानकारी दिएका थिए ।