टीकापुर, (कैलाली), १० भदौ, विगत ४ दिनदेखि आतंकित बनेको टीकापुरमा आज पुनः गोली चलेको छ । आज दिउँसो प्रहरी प्रमुखहरुको टीकापुर भ्रमणकै क्रममा टीकापुरको दुर्गोली क्षेत्रमै गोली चलेको हो । गोली प्रहारबाट स्थानीय २० वर्षीय जगत देवकोटा गम्भीर घाइते भएका छन् । देवकोटालाई पेटमा र घूँडामा गोली लागेको जनाइएको छ । उनको अहिले टीकापुर अस्पतालको इमर्जेन्सी कक्षमा उपचार भइरहेको छ ।
गत सोमबारदेखि आतंकित बनेको टीकापुर क्षेत्रमा सोही दिनदेखि निषेधाज्ञा र दंगाग्रस्त क्षेत्र घोषित गरिएको छ । त्यस क्षेत्रमा सेना परिचालन गरिएको छ । गत सोमबार दुर्गोली क्षेत्रमा भएको हिंसाको अनुगमन गर्न प्रहरी, शसस्त्र र नेपाल आर्मीका प्रमुखहरु जाने कार्यक्रम कै दौरानमा आज ती युवकमाथि गोली प्रहार भएको जनाइएको छ । कर्फ्यु लागि रहेको बेला दंगाग्रस्त क्षेत्रमा मोटरसाइकलमा सवार देवकोटालाई रोक्न आदेश दिँदा पनि जबरजस्ती कुदाएपछि बाध्य भएर गोली प्रहार गर्नु परेको सुरक्षा निकायले जनाएको छ । यता थारुहट/थारुवानको प्रदर्शन भने आज निस्किएको छैन । कर्फ्युपछि र आजको गोली काण्डपछि टीकापुर क्षेत्रका बासिन्दा आतंकित भएपनि बजार भने शान्त रहेको छ ।- आजको खबर डटकम बाट
