एउटै क्षेत्रको जीवनसाथी रोज्ने नेपाली कलाकार थुप्रै छन् । यसको जति फाईदा छ, उति नै बेफाईदा पनि छ । कतिपयले सकेसम्म एउटै क्षेत्रको व्यक्तिसँग विवाह गर्न नहुने विचार राख्छन् । तर, समस्याहरु सजिलै बुझ्न सक्छन् भनेर पनि एउटै क्षेत्रको व्यक्तिसँग विवाह गर्ने गरीन्छ ।
जीवनसाथी बनेका केहि जोडी मात्र लगातार पर्दामा देखिने गरेका छन् । एउटै क्षेत्र भनीए पनि थुप्रै महिला कलाकार नै विवाह पछि सेलाएको देखिन्छ । यति मात्र होईन विवाह भएका कतिपय जोडिको त सम्बन्ध नै बिग्रीएको छ ।
धुर्मुस/सुन्तली
सिताराम कट्टेल (धुर्मुस) र कुञ्जना घिमिरे (सुन्तली) हाँस्य टेलीश्रृंखला मेरी बास्यैबाट नजिक भए । टेलीभिजनको पर्दामा जोडि भएर देखिएको केहि समयमा नै उनीहरु वस्तवीक जीवनका जोडि भए । अहिलेसम्म पनि मेरी बास्यैमा धुर्मुस सुन्तलीको जोडि लोकप्रीय छ ।
हाँस्य क्षेत्रका भएकाले यो जोडिलाई धेरै फाईदा छ । उनीहरु देश विदेशमा हुने कार्यक्रममासँगै देखिन्छन् । दर्शक हँसाउँछन् । दर्शक हँसाएर नै लोभलाग्दो जीवन बिताईरहेका छन् । उनीहरुको काम मात्र होईन, मन पनि उत्तिकै मिलेको देखिन्छ ।
सामाजिक काममा पनि दुबै मिलेर सक्रिय हुन्छन् । कलाकारको यो जोडिले भूकम्पपछि काभ्रेमा आफ्नै नामको एकिकृत नमुना बस्ती नै निर्माण गरिसकेको छ । यो जोडिलाई पत्याएर सरकारले सरसफाई दुत पनि बनाएको छ ।
राजेश हमाल /मधु भट्टराई
नेपालका सुपरस्टार राजेश हमालले ५० वसन्त पार गरेपछि विवाह गरे । महानायक अविवाहित नै रहने हुन् कि भन्ने आशंकालाई चिर्दै उनले मधु भट्टराईसँग विवाह गरेका हुन् । उनी अविवाहित रहँदा उनलाई साथ दिन चाहने फ्यानहरु कम थिएनन् ।
देशको महानायकसँग जीवन काट्ने सपना बुन्नेहरु थुप्रै थिए । जन्मेदेखि नै राजेश हमालसँग विवाह गर्ने लक्ष्य बोकेकी फ्यानसम्म भेटीएकी थिईन् । तर, सबैलाई पछि पार्दै मोडल मधुले राजेश हमाललाई प्रेममा पारीन् । मोडलिङ क्षेत्रकी भए पनि विवाह पछि उनी अभिनयमा उत्रीएको देखिएको छैन ।
श्रीकृष्ण श्रेष्ठ र स्वेता खड्का
यो जोडिलाई पर्दामा पनि खुबै रुचाईएको थियो । चलचित्र कहाँ भेटिएलाका लागि श्रीकृष्ण आफैँले स्वेतालाई खोजेका थिए । चलचित्र कहाँ भेटिएलाले श्रीकृष्णलाई स्वेतासँग नजीक बनायो । केहि समयमा उनीहरु प्रेममा परे । स्वेताले श्रीकृष्णको अरु फिल्ममा पनि अभिनय गरिन् । सम्बन्ध प्रगाढ बन्दै जाँदा उनीहरु जीवनसाथी बन्ने निष्कर्षमा पुगे ।
श्रीकृष्णले स्वेतासँगै लगनगाँठो कसे । तर, विवाहपछि श्रीकृष्ण बिरामी परे । यो जोडिको यात्रा लामो समय रहन पाएन । श्रीकृष्णले संसार छाडे, स्वेतालाई एक्लो पारे । स्वेताको मनमा भने अझै श्रीकृष्ण बसीरहेका छन् ।
कृष्ण मल्ल/शर्मीला मल्ल
नायक कृष्ण मल्ल र शर्मीला मल्लको जोडि केहि चलचित्रहरुमा देखियो । एक समयका चर्चित नायक, नायिका थिए यो जोडि । मन पराइएको थियो उनीहरुलाई । फिल्मी क्षेत्रले नै यो जोडिलाई नजीक बनायो । जीवनसाथी बनायो । कृष्ण मल्ल अहिले पनि बेलाबेलामा सिने क्षेत्रमा झुल्कीने गरेका छन् । शर्मीलालाई भने फिल्ममा त्यति देखिएको छैन ।
सुनील पोख्रेल /निशा शर्मा (पोख्रेल)
सुनील पोख्रेल र निशा शर्मा दुबै रंगकर्मी हुन् । रंग क्षेत्रमा उदाउनका लागि निशालाई सुनीलको ठूलो सहयोग छ । सुनीलको त्यो सहयोगसँगै एकअर्कालाई बुझ्ने मौका मिल्यो । दुबैको मन पनि मिल्यो । उनीहरुको नजिकपन जीवनसाथीमा रुपान्तरण भयो ।
अहिलेको रंग क्षेत्रमा सुनीलका शिष्यहरुकै बोलवाला छ । कतिपय चलचित्रको पर्दामा पनि लोकप्रीय भइसकेका छन् । लामो समय नाट्य क्षेत्रमा रमाएका उनी अहिले केहि निस्कृय देखिएका छन् । पुरानो बानेश्वरमा रहेको गुरुकुल हटेपछि उनको नाट्यकर्म घटेको हो । यद्यपी, विभिन्न ठाउँमा गुरुकुल समूहले नाटकहरु भ्ने मञ्चन गरिरहेको छ ।
केहि समय अघि सुनील पोख्रेलको निर्देशनमा मञ्चन भएको नाटक रशोमोनमा निशा शर्मा मुख्य भूमिकामा देखिएकी थिईन् । उनी अहिले पनि उत्तिकै राम्रै देखिएकी थिईन् । निशा बोलक्कड स्वाभावकी छिन् भने सुनील कमै मात्र बोल्छन् ।
मुकेश आचार्य/मेलीना मानन्धर
मुकेश र मेलीनाबीच अभिनयकै क्रममा भेट भएको थियो । चलचित्र क्षेत्रले उनीहरुको निकटता बढायो । निकटता जीवनसाथीमा परिर्वतन भयो । अभिभावक बनीसकेका उनीहरुको अन्तरजातिय विवाह भएको हो । सिने क्षेत्र प्रवेशका हिसाबले मुकेश मेलीनाभन्दा कान्छा हुन् । मेलीना स्थापीत भइसकेपछि मुकेश मोडलिङ गर्दै फिल्ममा छिरेका हुन् । मायाले यस्ता कुरा हेर्दैन । उनीहरु प्रेममा परे विवाह गरे ।
निखिल उप्रेति/सञ्चीता लुईँटेल
एक्सन नायक निखिल उप्रेति केहि वर्ष हराएर फेरी नेपाली फिल्मी क्षेत्रमा देखिएका छन् । नायकबाट उनी निर्देशक पनि बनेर नेपाली फिल्मी क्षेत्रमा फर्किएका हुन् । उनको चलचित्र भैरवलाई दर्शकले खुबै मन पराए । जसले निखिललाई उत्साह थपेको छ ।
नायिका सञ्चीता लुईँटेलसँग वैवाहिक सम्बन्धमा गाँसीएपछि यो जोडि सिने क्षेत्रबाट अस्ताएको थियो । भारतमा बस्दै गर्दा निखिलले थुप्रै तालिमहरु लिन भ्याए । सञ्चीता सन्तान स्याहारमै व्यस्त भईन् । सञ्चीताको निखिल दोश्रो पति हुन्, भने निखिलको पनि सञ्चीता दोश्रो पत्नी हुन् । थुप्रै फिल्ममा प्रेमी जोडीको रुपमा देखिएको यो जोडि जीवनसाथी बनेको हो ।
करिश्मा केसी मानन्धर/विनोद मानन्धर
करिश्मा मानन्धर १४ वर्षको किशोरी रहँदा नै नायिका बनीसकेकी थिईन् । चलचित्र सन्तानबाट अभिनय सुरु गरेकी उनले चलचित्रकर्मी एवं निर्देशक विनोद मानन्धरसँग विवाह गरेकी हुन् । चलचित्र कस्तुरीमा काम गर्दै गर्दा विनोदसँग उनको विवाह भएको हो ।
फिल्महरुको खाँचो भएन । विनोद र करिश्माको छोरी कविता जन्मीएपछि करिश्माको अभिनय यात्रामा सुस्तता छायो । उनी केहि वर्ष अमेरिकामा बसीन् । अमेरिकाको बसाई पछि फेरी उनी नेपाल फर्किएर अभिनय कर्ममा छिन् । पहिलेजस्तो व्यस्त नभएपनि उनको लोकप्रीयता र सुन्दरता भने अहिले पनि उस्तै छ ।
रेखा थापा/छविराज ओझा
रेखा थापा छविराज ओझाको फिल्म हिरोबाट हिरोईन् भएर नेपाली सिने क्षेत्रमा उदाएकी हुन् । राजेश हमालको जोडि भएर हिरोमा अभिनय गर्दै गर्दा छवि र उनको निकटता बढ्यो । विवाह गर्न राजी भए, परम्परागत रुपमा विवाह गरे । विवाह हुँदा रेखा किशोरी थिईन् ।
छविले निर्माण गरेको फिल्मसँगै उनले अन्य थुप्रै फिल्ममा अभिनय गरिन् । उनको अभिनयले चर्चा पायो । माग बढ्यो । सुपरहिट नायिकाको परिचय बनाईन् । विवाह भएको एक दशक पछि यो जोडि छुटेको छ । रेखा अहिले आफ्नै ब्यानरमा चलचित्रहरु निर्माण गरिरहेकी छिन् । उनका चलचित्रले अहिले पनि सफलता पाईरहेका छन् ।
झरना थापा/सुनिल कुमार थापा
झरना थापाको विवाह निर्माता सुनिल कुमार थापासँग भएको हो । एउटै क्षेत्रमा रहेकाले नै नायिका र निर्माताको सम्बन्ध जीवनसाथीमा परिणत भएको हो । सुनिलले लगानी गरेका अधिकाँस चलचित्रमा झरनाले अभिनय गरेकी छिन् । सुन्दरी नायिका झरनाले अहिले पनि फिल्म खेलीरहेकी छिन् । उनको सुन्दरता अहिले पनि उस्तै छ ।
रञ्जना शर्मा/श्याम भट्टराई
नायिका रञ्जना शर्मा सिने क्षेत्र जम्न त सकिनन् । यद्यपी उनी सिने क्षेत्रमा प्रवेश गरेपछि निर्देशक श्याम भट्टराईको आँखामा परिन् । श्यामसँगको सम्बन्ध निकट भयो । उनीहरु विवाह बन्धनमा बाँधिए । त्यो बन्धन दुबैलाई मन परेन । केहि समयपछि यो जोडिको सम्बन्ध टुट्यो । श्याम अहिले अमेरिकामा छन् । रञ्जना पनि फिल्मी क्षेत्रबाट हराएकी छिन् ।
शंकर घिमिरे/ऋचा घिमिरे
नेपाली सिने क्षेत्रकी काली सुन्दरी भनेर चिनीने नायिका ऋचा घिमिरेले सिने क्षेत्रमा प्रवेशसँगै तहल्का मच्चाईन् । उनले फिल्ममा दिएका केहि दृश्यहरुले सिने क्षेत्रलाई नै तताएको थियो । निर्देशक शंकर घिमिरेको आँखा परिन् ऋचा । निर्देशक र नायिकाको सम्बन्ध नजिकिँदै जाँदा जीवनसाथी नै बने । अहिले यो जोडि अमेरिकामा छन् । विवाह पछि अहिले सन्तान स्यार र व्यापारमा व्यस्त छन् यो जोडि । – स्रोत रेडियो अडियो
