नक्सालस्थित नेपाल प्रहरीको मुख्यालय र भगवतीबहालको पश्चिम उत्तरतर्फ जगदम्बा ग्रुपले पाँच तारे होटल जगदम्बा हस्पीटालीटी निर्माण गर्दै गरेको बारे यहाँलाई जानकारी गराइन्छ ।
म नक्सालबासीनै भएतापनि निर्माणाधिन क्षेत्रमा होटलनै बन्ने बारेमा जानकारी थिएन । त्यहाँ कुनै व्यापारीक महल वा एपार्टमेन्ट बन्दै होला भन्ने ठानेको, होटल निर्माण हुँदैरहेछ, त्यो पनि तीन तला अण्डरग्राउण्डसहित सत्रतले । सायद काठमाडौंमा हालसम्मकै अग्लो होला ।
पहिलो कुरा प्रहरी मुख्यालयकै अगाडी सुरक्षा गोपनियताका कारण पनि त्यस्ता गगनचुम्बी भवन निर्माण हुनु कति सान्दर्भीक थियो ? त्यस्ता गगनचुम्बी होटल निर्माण गर्नु पर्दा सुरक्षा निकायसँग अनूमति लिइनु पर्ने वा नपर्ने के हो ? त्यसपछि जनघनत्व बढी रहेको ठाउँमा निर्माण हुने तारे होटलको साघुँरो सडकले भविष्यमा उक्त होटलमा आउने विशिष्ठ तथा विदेशी पाहुनाका सवारीको लस्कर थाम्न सक्ला ? यी त भए भविष्यमा निस्कने प्रश्न ।
तर, अहिले भवन निर्माणको सुरुवातीमै उक्त क्षेत्रका छिमेकीले दिनरात भोग्नु परेको तनाबका सन्दर्भमा कसले निकास निकाली दिने ?
ठूला ठूला हेभी मेसीनरीले चौविसैघन्टा काम गरिरहँदा आउने आवाजले न दिनमा टिभी हेर्न पाएका छन्, त्यस वरपरका छिमेकीले न त मोवाइलमै कुरा गर्न सक्ने अवस्था छ । निर्माणाधिन क्षेत्रसँगै जोडीएका घरवालाहरुले भूकम्पकै अनुभव लिइरहनु परेको अवस्था छ, हेभी मेसीनरी सञ्चालन हुँदा निरन्तर आइरहने कम्पनका कारण । धुलो र धुँवाले पनि हैरानीमा छन् उनीहरु । रातमा फोकसीङ बत्ति बालेर गरिँदै आएको कामकाजका कारण बन्द कोठाभित्र चर्काे आवाजसँगसँगै झिलीमिली उज्यालो छिर्दा कोही राम्रोसँग निदाउन पाएको अवस्था छैन ।
न दिनमा आराम न रातमा ? यस्तो समस्यामा छन् नक्सालबासी । तर पनि सम्वन्धित निकायले चासो दिएको छैन ।
आफ्नो सम्पत्तिमा आफ्नो अधिकार पक्कै हुन्छ । आफ्नो जग्गामा जग्गाधनीले भवन निर्माण गर्न पाउँछ । तर, जनताको जिउधनको सुरक्षा पनि राज्यको दायित्व होइन र ? त्यस अवस्थामा उनीहरुको शान्तिपूर्वक बाँच्न पाउने मौलीक अधिकार खोई त ?
सडकपेटीनै धसीने गरी यतीबेला निर्माणाधिन क्षेत्रको माटो झिक्ने काम भइरहेको छ । पेटी नहुँदा पैदलयात्रु सडकमा हिँडेको देखेर पनि मौन छ, ट्राफिक प्रहरी । तीनतला अण्डरग्राउण्ड बनाउने योजना छ, हाल ‘पाइलीङ’ कार्य सकिएको छ । यती हुँदै वरपरका घर पर्खाल चर्किन थालेका छन्, तीनतला बराबरको जमिनबाट माटो झिक्दासम्म कतिका पर्खाल भत्कने हो ? कतिका घर जगैसित भासिने हुन ? छिमेकीका घरको पानीको स्रोत (इनार, बोरिङ)को अवस्था के हुने हो ?
अहिलेलाई यतीमात्र जानकारी गराउँ कि उद्योगी व्यवसायीले लगानी गर्ने वा औद्योगिक व्यापारिक प्रतिष्ठान खोल्ने भन्दैमा उक्त क्षेत्र वरपरका बासीन्दालाई तनाब दिन मिल्छ ? वरपरका कयौं छिमेकी मुटुरोग, चिनीरोग, उच्च रक्तचापलगायत गम्भीर प्रकृतिका विरामी भएको भन्दै प्रहरी वृत्त, कमलपोखरीमा आफूहरुलाई चिकित्सकले प्रशस्त आराम गर्न सल्लाह दिएको भएता पनि निर्माणाधिन कार्यले गर्दा आरामको त कुरै छाडिदिऊ, आँखासम्म झिमिक्क पार्न सक्ने अवस्था नरहेको भन्दै सप्रमाण गुनासो गरिरहेका छन् । तर, पनि पुलीसका तर्फबाट खासै सुनुवाई भइरहेको छैन ।
सम्वन्धित निकायले बनाउने स्वीकृती दिइसकेपछि हामीले कसरी नबनाउ भन्न मिल्छ भन्ने प्रहरीको भनाइँ कति सान्दर्भीक हो ? कति उचित हो ?
पिडीत छिमेकीहरु काठमाडौं महानगरपालीकामा पुगेर त्यहाँका कार्यकारी प्रमुखलाई भेटेर आफूहरुले भोग्दै आएको समस्या सुनाए । गुनासो सुनेर कार्यकारी प्रमुख एकाएक पग्लीए । उनले आदेश दिए, रातमा निर्माणकार्य गर्न नदिनु । महानगरपालिकामा दुबै पक्षबीच लामो छलफलपछि कानून कार्यान्वयन विभागका प्रमुखले लिखित समझदारी नै गराए, राती साढे आठ बजेपछि हेभी मेसीनरी चलाउन नपाइने, यदी चलाएको पाइए निर्माण कार्य पूरै रोकिने भनेर । तर, छिमेकीको दुर्भाग्य ! रात्री अवस्थामा पनि हेभी मेसीनरीबाट काम भइरहेको छ ।
रातीमा काम गर्न ठूला फोकस लाइट प्रयोगमा ल्याइएको छ । ती लाइटबाट आउने उज्यालोले छिमेकीका घरका झ्याल, पर्दाबाट समेत छिरेर आँखा झिमीक्क पार्न दिएको होइन । दिनमा चर्काे आवाज र धुलो धुँवा, रातमा पनि चर्कै आवाज र चर्कै उज्यालोले गर्दा नक्सालबासी पिडीत भइरहेका छन् । तर, पचास मिटरको दूरीमा रहेको नेपाल प्रहरीको हेडक्वाटरले त्यो नागरिकको समस्या, उनीहरुले भोग्नु परेको पिडा देखेर समेत नदेखेजस्तै गरिरहेको छ ।
सायद मनी र पावरकै कुरा त होला नि छिमेकीले भोग्नु परेको समस्या ? सम्पादक ज्यू, यदी स्वतन्त्र पत्रकारितामा अघि बढेको हो भने सम्वन्धित स्थानमा गएर त्यहाँका छिमेकीलाई परेको समस्या छर्लङ्ग हुने रिपोटीङ प्रकाशन होस् भन्ने अपेक्षा छ ।
शुभेच्छुक
राज
