">
काठमाडौँ । नेपालमा हामी इन्साइडर ट्रेडिङ अर्थात भित्री कारोबार भयो र यो काम गैरकानुनी हो भन्ने सुन्ने गरेका छौं । तर हालसालै बन्द भएको अमेरिकाको १६औँ ठुलो बैंक सिलिकन भ्याली बैंकका सीइओ ग्रेग बेकरले पनि बैंक बन्द गर्ने निर्देशन आउन लागेको भित्री सूचना पाएर आफ्नो सेयर बेचेको खुलासा भएको हो । सीएनबिसीले जनाए अनुसार युनाइटेड स्टेट्स फेडरल डिपोजिट इन्स्योरेन्स कर्पोरेशन, एफडीआईसीले नियन्त्रण लिनुअगाडी बैंकका सीइओले सेयर बिक्री गरेका थिए ।
बैंकका प्रमुख कार्यकारी अधिकृत र वित्त प्रमुखले बैंक बन्द हुनुभन्दा दुई हप्ता अगाडी मात्रै झन्डै ४१ लाख अमेरिकी डलर बराबरको सेयर बिक्री गरेको न्युवर्क पोष्टले जनाएको छ । बैंक बन्द भएको ११ दिन अघि सीइओले सिलिकन भ्याली बैंकको ३५ लाख डलर बराबरको १२ हजार ५०० कित्ता सेयर र बित्त प्रमुख डेनियल बेकले ५ लाख ७५ हजार १८० डलर बराबरको सेयर बिक्री गरेका छन् । बैंक बन्द हुनु एक दिन अगाडी सो बैंकको सेयर ६० प्रतिशतले घटीसकेको थियो । सीइओले सेयर बेचेको घटनालाई गम्भीर रुपमा हेरिएको जनाइएको छ ।
कर्मचारीलाई ऐतिहासिक बोनस !
सेयर बिक्रीमात्र होइन, सीइओले आफ्ना कर्मचारीहरुलाई हालसम्मकै ऐतिहासिक बोनससमेत बाँडेको सीएनबिसीले जनाएको छ । बैंक बन्द हुनु अगावै सिलिकन भ्याली बैंकले प्रति कर्मचारी १२ हजार डलरदेखि एक लाख ४० हजार डलरसम्म बार्षिक बोनस वितरण गरेको छ । बैंक बन्द हुनु केहि घण्टा अगाडी मात्र संचालक समितिमा प्रस्ताव लगेर स्वीकृत गराई कर्मचारीलाई ऐतिहासिक बोनस खुवाइएको अमेरिकी संचारमाध्यमहरुले जनाएका छन् । यो बैंक कर्मचारीहरुलाई राम्रो तलव सुविधा र बोनस दिने बैंकका रुपमा अमेरिकामा प्रख्यात थियो । बैंकको तथ्यांकअनुसार डिसेम्बर २०२२ सम्म ८ हजार ५२८ कर्मचारी थिए ।
यता बन्द भएको सो बैंक ट्वीटरका मालिक एलन मस्कले किन्ने चाहाना देखाएका छन् । ट्वीटरमा एक व्यवसायीको ट्वीटको जवाफ दिंदै मस्कले यस्तो प्रतिक्रिया दिएका हुन् । उनले आफु सो बैंक किन्न तयार भएको र सो बैंकलाई डिजिटल बैंक बनाउन आफु तयार रहेको दाबी गरेका छन् । सिलिकन भ्याली बैंकको नाममा २०९ अर्ब अमेरिकी डलरको सम्पति छ । सिलिकन भ्याली बैंक सन् २००८ को आर्थिक मन्दीपछि बन्द हुने अमेरिकाको दोस्रो ठुलो संस्था हो भने पहिलो बैंक हो । सन् २००८ को आर्थिक मन्दीमा वाशिंगटन म्युचुअल फण्ड बन्द भएको थियो।
युनाइटेड स्टेट्स फेडरल डिपोजिट इन्स्योरेन्स कर्पोरेशन, एफडीआईसीका अनुसार सिलिकन भ्याली बैंकसँग २०९ अर्ब अमेरिकी डलर बराबरको सम्पति, र १७५ अर्ब ४० करोड अमेरिकी डलर बराबरको निक्षेप छ । बैंक बन्द भए पनि निक्षेपकर्ताको रकम भने फिर्ता हुने बैंकले जनाएको छ ।
