मिति: २०८२ साल पुष २९ गते मंगलबार
स्थान : जिल्ला सिन्धुली, घ्याङलेख गाउँपालिका
समय: बेलुकी ६:३० बजे
लुटेराहरु आए, गार्डलाई सुरुमा आक्रमण गरे । रोक्न खोज्दा सुरक्षा गार्डको हात काटिदिए, पेस्तोल र खुकुरी देखाएर तर्साए । मुख बाँधेर एक ठाउँ राखे ।

बैंकका कर्मचारी सोहि बैंक भएको माथिल्लो तल्लामा बस्छन् । बैंक लुट्न आएको समूहका केहि माथि बैंकका कर्मचारी भएको ठाउँमा पुग्छन्, उनीहरुलाई डोरीले बाँध्छन्, नबोल्न भन्छन्, मुख थुनिदिन्छन् । बैंकको पैसा राखिएको ठाउँको चाबी माग्छन्, र ढोका लगाईदिन्छन् ।

यो पनि:९ बुँदामा नेपाल एसबिआई लुट प्रकरणको अपडेट: स्थानीयले ढुंगा हानेपछि पैसा छर्दै भागे लुटेरा, ‘पेस्तोल देखाएर लुटे’

यो पनि:नेपाल एसबिआइ बैंक लुट प्रकरण: लुटेरालाई रोक्न खोज्दै थिए गार्ड कार्की, काटीदिए हात, यस्तो छ अवस्था (अपडेट)

कोहि सुरक्षा गार्डको निगरानीमा बस्छन्, कोहि बैंकका कर्मचारीको । केहि मिनेटमै बोरामा पैसा पोको पारेर लुटेराहरु भाग्छन् । यो कुनै फिल्मको कहानी होइन, सिन्धुलीको घ्याङलेख गाउँपालिकामा रहेको नेपाल एसबिआई बैंक लुटको घटना हो । आउनुहोस्, सिन्धुलीमा रहेको बैंक लुट प्रकरणलाई बुँदागत रुपमा टाइमलाइन अनुसार बुझौँ ।

बेलुकी ६:३० बजे : लुटेराहरु बैंक छिरे
गाउँपालिकाको भवनमा नेपाल एसबिआई बैंकको शाखा छ । सो शाखाको माथिल्लो तल्लामा सोहि बैंकका कर्मचारीहरु बस्छन् । बैंकको मुख्य गेट बन्द थियो । तर बैंक भएको घरको पछाडीपट्टी ओहोरदोहोर गर्ने अर्को एउटा ढोका छ । सो ढोका भने त्यहाँ बस्नेहरु ओहोरदोहोर गर्नका लागि खुला हुन्छ । बैंक लुटेराहरु सोहि गेटको प्रयोग गरेर बैंक छिरेका थिए । बैंक छिर्ने बित्तिकै उनीहरुले गार्डमाथि आक्रमण गरी, अरु कर्मचारीको पनि हात बाँधीदिए, मुख थुनिदिए र चाबी लिए । केहि समयभित्रै बैंक लुटेर उनीहरु भागे ।

करिव ६:४५ बजेतिर : बैंकका कर्मचारीले प्रहरीलाई फोन गरे
बैंक लुटेराहरुले कर्मचारीहरुलाई बन्धक बनाएर राखेका थिए । लुटेराहरु पैसा लिएर हिँडेपछि बैंकका कर्मचारीले प्रहरीलाई फोन गरे । केहि समयभित्रै प्रहरी आईपुग्यो, उनीहरुको उद्धार गर्यो, घटनाबारे जानकारी लियो र अनुसन्धानमा लाग्यो ।

६:४५ तिरै गाउँमा हल्लाखल्ला सुरु भईसकेको थियो ।
गाउँलेहरुलाई बैंक लुटिएको थाहा भएपछि उनीहरुले हारगुहार गरे, कराए । तुरुन्त प्रहरी परिचालन भयो । प्रहरीहरुले आफ्नो पिछा गरेको थाहा पाएपछि लुटेराहरु उनीहरुले प्रयोग गरेको गाडी त्यहिं छोडेर जंगलै जंगल भागे । उनीहरुले भागेको देखेपछि केहि स्थानीयहरुले उनीहरुलाई ढुंगाले हान्नसमेत खोजेका थिए ।

यो पनि:नेपाल एसबिआई बैंक लुट प्रकरण Update : बैंक मेनेजर भन्छन्- ‘अहिले सबै प्रहरीसँगै छौँ, कर्मचारी सुरक्षित छौँ’

लुटेराहरुले सकेको पैसा बोके, नसकेको त्यहिँ छोडिदिए । लुटेको मध्ये एक बोरा पैसा गाडीमै छोडिदिए । बोकेको अरु पैसा पनि भाग्ने क्रममा उनीहरुले ठाउँ ठाउँ फाले । जंगलको बाटोमा नोटका बिटाहरु यत्रतत्र छरिए, भाग्ने क्रममा एक ठाउँ त लुटेराहरुलेबोरा नै छोडे । उनीहरुलाई पछ्याईरहेको प्रहरी र स्थानीय बासिन्दाले लुटेरा त भेटेनन्, तर बोराभरि पैसा भेटे, जुन पैसा स्थानीयले प्रहरीको जिम्मा लगाईसकेका छन् ।

प्रहरीले बैंक लुट्नका लागि प्रयोग भएको गाडी र सवारी चालक नियन्त्रणमा लिएर अनुसन्धान थाल्यो । प्रारम्भिक बयानका क्रममा सवारीचालकले केटी भगाउने भन्दै गाडी रिजर्भ गरेको, हामी कुरा मिलाएर केहि छिनमा आउँछौँ भनेको र गाडी र ड्राइभरलाई बैंक अगाडी राखेको बताए । तर पछि उनीहरुले पैसाका बोरा लोड गरेर गाडी कुदाउन भनेको सवारी चालकको भनाई छ । उनका अनुसार अलि अघि गएपछि मात्र बैंक लुटिएको थाहा भयो । प्रहरीहरु पिछा लागेको थाहा भएपछि उनीहरुले गाडी रोक्न लगाएर भागेका थिए ।

यो पनि:अपडेट: बैंक लुटिएपछि प्रहरीले चलायो ‘सर्च अपरेशन’, २ बोरा पैसा जंगलमा फेला, लुटेरा अझै फरार (फोटो /भिडियो)

यो पनि:नेपाल एसबिआईबाट लुटिएको ३ करोड ११ लाख रुपैयाँमध्ये एक बोरा पैसा बरामद, ड्राइभर गाडीसहित पक्राउ, अरु फरार

रात छिपिंदै गर्दा, अवेरसम्ममा लुटेराहरुले भाग्ने क्रममा जंगलमा छाडेका नोटहरु केहि भेटिए, केहि भेटिएनन् । प्रहरीले सर्च अपरेशन चलाएको छ, बैंकका कर्मचारीहरुलाई सोधपुछ गरेको छ, उनीहरुलाई आफ्नै सुरक्षामा सुरक्षित राखेको छ । घटनाबारे बैंकको केन्द्रीय कार्यालयमा जानकारी पुगिसकेको छ । यस विषयमा नेपाल राष्ट्र बैंकले पनि चासो राखेको छ भने बैंकले पाएको सूचना राष्ट्र बैंकका अधिकारीहरुलाई दिएको छ ।