काठमाडौ – पुष्प कमल दाहाल अन्तिम समयमा आएर प्रधानमन्त्री नबन्ने संकेत देखिएको छ । नेपाली काँग्रेस, नेकपा माओवादी केन्द्र र संयुक्त लोकतान्त्रिक मधेशी मोर्चाबीच मंगलबार कुनै सहमति हुन नसकेपछि यस्तो संकेत देखिएको हो ।

तीन बुँदे मौखिक सहमति गरेर प्रचण्डले प्रधानमन्त्रीको उम्मेदवारी दिन जाँदा त्यसमा मधेशी मोर्चाका नेताहरुले समर्थन जनाएका थिए । तर पछी कुरा नमिलेको बताइएको छ । 

तीन बुँदे मौखिक अनुसार सरकार निर्माणपछि मधेस आन्दोलनका क्रममा मारिएकालाई सहिद घोषणा गर्ने मुद्दा फिर्ता लिने , घाइते र मृतकका परिवारलाई क्षतिपूर्तिलगायतका कार्य तत्काल गर्ने, मधेशी मोर्चा र संघीय गठनबन्धनले प्रस्तुत गरेको ११ बुँदे र २६ बुँदे मागलाई दृष्टिगत गर्दै अविलम्ब सविधान संशोधन गर्ने र प्रधानमन्त्रीको चुनावमा मतदान गर्ने सहमति भएको थियो ।

तर मोर्चाका नेताहरुसहितको समर्थनमा मनोनयन दर्ता गरेर गएपछि प्रचण्ड र कांग्रेस सभापति शेरबहादुर देउवा पुनः बैठकमा नफर्केपछि अन्य नेताहरुको बीचमा सहमति हुन हुन नसकेको एक नेताले बताए ।

छलफलका क्रममा प्रचण्डले कमल थापालाई ओली सरकारकै हैसियतका साथ सरकारमा सहभागि हुन आग्रह गरेका थिए भने गच्छदारलाई पनि सहभागिताका लागि आग्रह गरेका थिए ।

जवाफमा थापाले आफूहरुले भोलि पार्टीको बैठक बोलाएको र त्यसले के गर्ने भन्नेमा ठोस निर्णय गर्ने बताएका थिए भने गच्छदार प्रचण्डलाई सघाउन सकारात्मक भएका थिए ।