">
काठमाडौँ – चारदिने राजकीय भ्रमणका लागि बिहीबार अपराहन भारत आइपुगेका प्रधानमन्त्री पुष्पकमल दाहाल ‘प्रचण्ड’ ले आफूले भारत र चीनसँग सन्तुलित सम्बन्ध राख्न प्रयास गरिरहेको बताएका छन् ।
नयाँदिल्ली आएलगत्तै आफ्ना पार्टीका नेता तथा कार्यकर्तासँगको भेटघाटमा उनले दुवै छिमेकीसँगको सम्बन्धलाई सन्तुलित बनाउन आफ्नो नेतृत्वमा सरकार बनेलगत्तै भारत र चीनमा विशेष दूत पठाएको बताए । नयाँ सरकारले गृहमन्त्री विमलेन्द्र निधिलाई भारत र अर्थमन्त्री कृष्णबहादुर महरालाई चीन पठाएको थियो ।
भेटमा सहभागी माओवादी केन्द्रका नेता लक्ष्मण पन्तका अनुसार प्रचण्डले आफ्नो प्रयास दुवै देशसँगको सम्बन्धलाई सुदृढ र सन्तुलित बनाउने रहेको बताएका थिए । ‘मेरो भ्रमणपछि संविधान जारी भएयता भारतसँग देखापरेका मनोमालिन्य अन्त्य हुन्छ । भ्रमणको उद्देश्य भारतसँगको सम्बन्ध सुदृढ बनाउनु हो,’ प्रचण्डलाई उद्धृत गर्दै पन्तले भने ।
प्रचण्डले आफ्नो भ्रमणको समयमा नेपालको अहित हुने सन्धि तथा सम्झौता नगर्नेसमेत बताए । पुराना परियोजनाहरूबारे भारतीय पक्षको कुरा बुझेपछि मात्र कसरी अगाडि जान्छ भन्न सकिने ले बताए ।
प्रवासी नेपालीहरूलाई सम्बोधन गर्दै प्रधानमन्त्रीले सरकारको प्रमुख प्राथमिकता संविधान कार्यान्वयन भएको बताए । उनले संविधान कार्यान्वयनका लागि सरकारले केही महत्त्वपूर्ण निर्णय गरिसकेको समेत बताए । उनले आन्तरिक एकता सुदृढ गरेर मात्र छिमेकीहरूसँगको सम्बन्ध सुदृढ बनाउन सकिने उल्लेख गरे ।
प्रचण्डले मधेसी, थारूलगायत जनताको माग सम्बोधन गर्न संविधान संशोधन नगरेसम्म संविधान र संघीयता कार्यान्वयन हुन नसक्ने बताए । ‘मधेसी, दलितलगायतका माग सम्बोधन नगरी संविधान कार्यान्वयन हुन सक्दैन, हामी त्यसको वातावरण बनाइरहेका छौं,’ उनले भने ।
यसअघि प्रचण्डले भारतका साना दलका केही नेताहरूसँग नेपाली दूतावासमै भेटघाट गरेका थिए । नेसनलिस्ट कांग्रेसका महासचिव डीपी त्रिपाठीले दुई देशबीच सम्बन्ध विस्तार गर्ने र विश्वासको वातावरण तयार पार्नेबारे दाहालसँग कुराकानी भएको कान्तिपुरलाई बताए ।
‘भारत सरकारले नेपालमा रोकिएका परियोजनालाई तत्काल अगाडि बढाउनुपर्छ भन्ने हाम्रो धारणा हो,’ त्रिपाठीले भने । भारतीय नेताहरू सीताराम यचुरी र शरद यादवसँग पनि प्रचण्डले भेटघाट गरे ।
उनले ती नेताहरूसँग नेपालको शान्ति प्रक्रिया कसरी टुंगोमा पुर्याीउन सकिन्छ भन्नेबारे समेत धारणा माग गरेका थिए । त्रिपाठीले राजनीतिक मामिला नेपालको आन्तरिक विषय भएको बताए । प्रचण्डले बिहीबारै विहारका मुख्यमन्त्री नितिश कुमारसँग पनि भेटघाट गरे ।
- कान्तिपुर दैनिक
