काठमाडौँ – भारतमा आइतबार सम्पन्न ८ औँ ब्रिक्स सम्मेलनमा भारतीय प्रधानमन्त्री नरेन्द्र मोदीको एउटा योजनाले फेल खाएको छ । एक महिना पहिले भारत–पाकिस्तान सीमा क्षेत्रमा भएको हमलामा १८ भारतीय सैनिक मारिएपछि यी दुई देशबीच बढ्दो दुरीका बीच मोदीले ठूलै योजना बुनेका थिए । तर, चीनले खासै चासो नदेखाएपछि उनको योजना असफल भएको छ ।
पाकिस्तानसँग बढ्दो दुस्मनीका बीच ब्रिक्स सम्मेलनमा उपस्थित शक्तिशाली राष्ट्रसँग मिलेर उसलाई विश्वसामू एक्ल्याउने मोदीको योजना विफल भएको हो । बिगतदेखि नै पाकिस्तानसँग नजिक मानिएको चीनले भारतको साथ लागेर पाकिस्तानलाई एक्ल्याउने मोदीको रणनीतिलाई इन्कार गरेको भारतीय संचारमाध्यमले पुष्टी गरेका छन् ।
सम्मेलनका क्रममा मोदीले पाकिस्तानलाई आतंकवादको जन्मभूमिको रुपमा घोषणा गर्ने प्रस्ताव राखेका थिए । चिनियाँ राष्ट्रपति सी जिङपिङले यस्तो रणनीतिमा चीनको समर्थन नरहेको स्पष्ट पार्दै चलाखीपूर्ण अन्तर्राष्ट्रिय आतंकवादका विरुद्ध लड्न विशेष रणनीति बनाएर अघि बढ्नुपर्ने बताए ।
भारतबाट संचालित भएको आरोप लागेका लश्कर–ए–तैयबा, जैश–ए–मोहम्मद जस्ता आतंकवादी संगठनका विषयमा चीन केही बोल्छ भन्ने भारतको विश्वास थियो । तर, बिक्स सम्मेलनको घोषणापत्रमा भारतमा संचालित यी आतंकवादी संगठनको विषयमा समेत कुनै सहमति हुन सकेन । भारतले पाकिस्तानमा जड जमाएका यी आतंकवादी संगठनको निशानामा भारत रहेको दाबी गर्दै आएको छ ।
अन्तर्राष्ट्रिय आतंकवादी संगठन इस्लामिक स्टेट, जबात–अल–नुसराको विषय घोषणापत्रमा उल्लेख गर्दा यी आतंकवादी संगठनको विषयमा ब्रिक्स राष्ट्रले कुनै चासो नदिनु भारतका लागि दुःखद् पक्ष हो । घोषणापत्रमा चीन, रुस, ब्राजिल, साउथ अफ्रिकाले उरी हमलाको निन्दा गरेता पनि पाकिस्तानको नाम भने कहीँ कतै उल्लखे गरिएको छैन । भारतले पाकिस्तानको नाम उल्लेख होस् भन्ने चाहेता पनि त्यो सफल हुन सकेन । यस विषयमा चीनले भारतको साथ दिएको भए अन्य ब्रिक्स राष्ट्र राजी हुने भारतको बुझाइ छ ।
उता रुस भारतका बीच कामोक हेलिकोप्टर २०० एयर डिफेन्स र कुडनकुलम प्लान्टसँगै उर्जा, बिजुली, स्मार्ट सिटी निर्माण र स्पेस लगायतका विषयमा भएको. सम्झौतालाई भने महत्वका साथ हेरिएको छ ।
