प्रविण बस्नेत अर्थात कामना सेवा बिकास बैंकका प्रमुख कार्यकारी अधिकृत । अर्थ सरोकारको भिडियो अन्तर्वार्ता स्तम्भ, ‘सीइओसँग ६ प्रश्न’को आजको अंकमा हामीले उनै बस्नेतलाई प्रस्तुत गरेका छौं । प्रस्तुत छ, उनीसँग गरिएको कुराकानीको सम्पादित अंश :

कामना सेवा बिकास बैंक कस्तो बैंक हो ? अहिलेको स्ट्याटस के छ ?

कामना सेवा बिकास बैंक राष्ट्रिय स्तरको ‘ख’ बर्गको बिकास बैंक हो । अहिले बिकास बैंकहरुमध्ये आफुलाई कसरी अब्बल बनाउने भन्ने विषयमा रणनीतिक रुपमा अगाडी बढिरहेको बैंक हो कामना सेवा बिकास बैंक ।बिगतमा पोखराको अब्बल बैंक कामना बिकास बैंक र बुटवलको अब्बल बैंक सेवा बिकास बैंकको मर्जरपछि बनेको संस्था हो कामना सेवा ।

मर्जरपछि कल्चरमा समस्या आउँछ भनिन्छ नि ! कामना सेवा बिकास बैंकलाई त्यस्तो समस्या पर्यो ? कि परेन ?

मर्जर भनेकै २ वा सोभन्दा बढी संस्थाहरुको मिलन हो । दुइवटा संस्थामा भिन्न प्राक्टिस, भिन्न बोर्ड गाइडेन्स्, भिन्न लिडरशिप, र भिन्न मेनेजमेन्ट हुन्छ । त्यस्ता दुइ संस्था एक आपसमा फरक हुनु स्वाभाविक हो । एउटै आमाले जन्माएका दुइ सन्तानलाई उही खालको लालनपोषण गर्दा त सन्तान दुइखाले भइदिन्छन् भने संस्थाहरु आफु इभोलुसन हुने फेजमा केहि फरक हुनु स्वाभाविक नै हो । पोष्ट मर्जरलाई इन्टिग्रेसन कसले र कसरी गरियो भन्ने कुराले अर्थ राख्छ । राम्रो भन्दा पनि हाम्रो तरिकाले वा अव के गर्ने भन्दा पनि हिजो के गर्यौं भनेर लागियो भने समस्या हुन्छ । तर राम्रो के हो भनेर लागियो भने केहि समस्या हुँदैन । कामना सेवा बिकास बैंकको हकमा पोष्ट मर्जर इन्टिग्रेसन सकिएको छ । हामीले दुवै संस्थालाई मिलाएर बेष्ट प्राक्टिस लिएर अगाडी बढेका छौं ।

कामना सेवा बिकास बैंकलाई शाखा विस्तारमा आवश्यकभन्दा बढी एग्रेसिभ भएको आरोप छ नि ? 

कामना सेवा बिकास बैंकको हकमा स्टोरी फरक छ । हामी राष्ट्रियस्तरको बैंक हुँदा हुँदै पनि धेरै ठाउँमा हाम्रा शाखा सञ्जाल निल थिए । प्रदेश १,२ र ३ मा हामीले रहरले भन्दा पनि बाध्यताले शाखा विस्तार गरेका हौँ । त्यहाँ हाम्रा शाखाहरु नै थिएनन् । सबै ठाउँमा शाखा नहुँदा फेरि राष्ट्रियस्तरको बिकास बैंक भनिरहन पनि अफ्ट्यारो हुन्छ भनेर हामीले शाखा विस्तारमा केहि जोड दिएका पक्कै हौँ । आगामी दिनहरुमा ब्रान्च ओपनिङमा हामी थप स्ट्राटिजिक भएर अगाडी बढ्छौं ।

तपाईंहरुको रणनीति एनआइसी एशिया बैंककै जस्तो छ भन्ने सुनिन्छ नि ! त्यस्तो हो ?

फरक छ । एउटा राष्ट्रिय स्तरको ‘क’ वर्गको बैंक र राष्ट्रिय स्तरको ‘ख’ बर्गको बिकास बैंक र त्यसमाथि पनि कान्छो बिकास बैंक उही स्ट्राटिजि लिएर मार्केटमा चल्ने कुरा हुँदैन । स्ट्राटीजी भनेको आफ्ना कमजोरी, राम्रा पक्ष र सबै पक्षका कुराहरु हेरेर कसरी बलियो भइन्छ भनेर बनाएको दस्तावेज हो । हामी एकदमै भिन्न धरातलबाट आएको बैंक भएकाले हामीले माटो सुहाउँदो स्ट्राटिजि बनाउनुपर्छ । तर लामो समय कमर्सियल बैंकिङ गरेर आएका हुनाले, धेरै समस्याहरु उस्तै छन्, पढेका मेटेरियलहरु उही छन्, कन्फेरेन्सहरु उस्तै खालका एटेन्ड गरिएका हुनाले स्ट्राटिजिमा केहि समानता आउनु संयोगमात्र हो ।

पछिल्लो समय बैंकिङ अलि बढी नै टफ भएको हो ?

बैंकिङमात्र होइन समग्र अर्थतन्त्र नै ‘टफ’ भएको हो । हिजोको बेला प्रतिष्पर्धा थिएन । कुनै प्रोडक्ट हुनु नै ठुलो कुरा थियो । तर आज एउटा प्रोडक्टकै धेरै सेलरहरु छन् । बैंकिङमा च्यालेन्जहरु बढी भएकै हो । कम्पिटिटर बढी भएपछि त्यो स्वाभाविक हो । तर यसलाई व्यवस्थापन गरेर अगाडी बढ्नुपर्छ । उदाहरणका लागि हामीले कसैको कर्मचारी खोसेर ल्यायौं भने अरु बैंकहरुले पनि त हाम्रो स्टाफ लैजान सक्छन्  नि ! यसरीमात्र काम गर्ने हो भने बजारमा हाम्रो योगदान के रह्यो र ? तर हामीले कलेजका विद्यार्थीहरुलाई ल्यायौं र अब्बल बनायौँ भने बजारमा हाम्रो योगदान हुन्छ । तर धेरैजसो हामी बैंकरहरु पहिलो शैली अर्थात सजिलो बाटोतर्फ लागिरहेका छौं । सजिलोबाटो बाट ‘ग्लोरी’ आउंदैन । कसरी राम्रो अभ्यास गरेर जाने भनेर अगाडी बढ्नुपर्छ ।

सेयरधनीले कामना सेवा बिकास बैंकबाट अव के अपेक्षा गर्ने ?

म चार्टड एकाउन्टेन्ट भएकाले पनि म बैंकका सेयरधनी, ग्राहक, कर्मचारी, रेगुलेटरहरुको सन्तुष्टिमा ध्यान दिन्छु । प्रमोटर र सेयरधनीले पाउने रिटर्नको आफ्नै महत्व छ । सबै कुरामा हामी अब्बल भयौं भनेमात्र हामी अब्बल हुन्छौं । धेरै ग्रोथ गर्दैमा वा धेरै डिभिडेन्ड दिँदैमा संस्था अब्बल हुने होइन । तर हामी बलियो हुने हिसाबमा अगाडी बढीरहेका छौं । तर पछिल्ला केहि बर्ष शाखा संजालहरु बढेका छन्, आइटिमा ठुलो खर्च छ, कर्मचारीको तालिममा बढी खर्च भएको छ । सबै कुराहरुमा कष्ट छ । कष्ट भन्दा पनि बढी इन्भेष्टमेन्ट छ । यो सबै कुराहरुको बाबजुत पनि दोहोरो अंकको दिभिडेण्ड दिन्छौं भन्ने विषयमा कोसिस गरिरहेका छौं ।

हेर्नुहोस् भिडियो :