काठमाडौँ । सेयर बजारबारे तालिम दिने भन्दै एक ट्रेनिङ सेन्टरले मान्छे जम्मा पार्थ्यो । सेयर बजारबारे तालिम लिन गएकाहरुलाई सो तालिम केन्द्रले सेयर बजारका कुराहरु सिकाउंदै, सेयर बजारभन्दा बढी फाइदा कमोडिटी बजारमा हुन्छ भन्दै सेयर लगानीकर्ताहरुलाई त्यतै पैसा लगाउन सुझाउँथ्यो । हो क्यार भन्दै धेरैले त्यतै पैसा लगाउँथे । तर नेपालमा पूर्ण रुपमा बर्जित यो व्यवसायको लाइसेन्स धितोपत्र बोर्डले कसैलाई पनि दिएको थिएन र छैन । यसरी कमोडिटी बजारमा लगानी गरेका थुप्रैले यो बजारमा गैरकानुनी दलालहरुमार्फत लगानी गरे । अधिकांसको पैसा डुब्यो । किनकि यो व्यवसाय थिएन, बरु दलालहरुले नेपाली फसाएर चलाईरहेको गैरकानुनी धन्दा थियो । प्रहरीका अनुसार यो धन्दा धितोपत्र बोर्डको अनुमितविना ०६४ देखि नै चल्दै आएका थियो । जब पीडित ठगिएको निष्कर्षमा पुगे, त्यसपछि मात्रै प्रहरीमा उजुरी पर्‍यो । प्रहरीका अनुसार कमोडीटी बजारका नाममा   मुलुकभरबाट १२ हजार दुई सय ५९ व्यक्तिलाई ठगिएको छ भने ६८ जनाले प्रहरीमा जाहेरी दिएका छन् । उनीहरूले मेक्स र एचसिसीले १० करोड ७४ लाख १६ हजार पाँच सय ७० रुपैयाँ ठगी गरेको मागदाबी गरेका छन् ।

ठगीमा पर्नेहरुको संख्या ठुलो भएपछी ठगिएकाहरु प्रहरीकहाँ पुगे । प्रहरीले यस विषयमा अनुसन्धान गर्यो । बुझ्दै जाँदा यो त नेपालमा पूर्ण रुपमा गैरकानुनी धन्दा रहेको तथ्य खुलेपछि प्रहरीले कमोडिटी मार्केट अर्थात वस्तु विनियम बजारका नाममा धन्दा चलाउनेहरुलाई पक्राउ गरी थप अनुसन्धान थाल्यो । बल्ल तथ्य खुल्यो कि, यो व्यवसायका नाममा त  तीन अर्ब रुपैयाँभन्दा धेरै रकम ठगी भईसकेको रहेछ । र त नेपालमा बर्जित गरिएको कमोडीटी मार्केटका नाममा गैरकानुनी धन्दा चलाएर ठगी गरेको अभियोगमा प्रहरीले विभिन्न अभियुक्तहरुलाई पक्राउ गरेको छ र उनीहरुविरुद्धको बयान जिल्ला अदालत काठमाडौंमा सुरु भएको छ ।