काठमाडौँ । सार्है कमजोर मानिएको तर प्रिमियम मूल्यमा आईपीओ निस्कासन भएको सोनापुर सिमेन्टको पहिलो कारोबारको बोहोनी नै खराब भएको छ । कारोबार भएको पहिलो दिन नै सोनापुरको कारोबारमा नेगेटिभ सर्किट लागेर कारोबार नै बन्द भएको हो ।
दोस्रो बजारको प्रि–ओपनिङ सेसनमा ३ सय ५० रुपैयाँमा कारोबार खुलेको कम्पनीको सेयरमूल्य १० प्रतिशतले घटेर ३ सय १५ रुपैयाँमा झरेको छ । कारोबारको पहिलो दिन सोनापुरको सेयर किन्ने भन्दा बेच्नेको भीड लागेको छ । कम्पनीले दोस्रो बजारको पहिलो कारोबारका लागि १ सय ४२ रुपैयाँ १ पैसादेखि ४ सय २६ रुपैयाँ ३ पैसासम्म ओपनिङ रेञ्ज तोकेको थियो । र हामीले यस विषयमा सेयर विश्लेषक रामहरी नेपालसँग संक्षिप्त कुराकानी गरेका छौँ । प्रस्तुत छ अर्थ सरोकारकर्मी सुदर्शन श्रेष्ठले नेपालसँग गरेको कुराकानीको सम्पादित अंशः
कारोबारको पहिलो दिनमै सोनापुरको सेयर मूल्यमा नेगेटिभ सर्किट लाग्नु अपेक्षित थियो कि अनपेक्षित हो ?
खासमा यो अपेक्षित नै थियो । यो आईपीओ र त्यसपछिको प्राइसलाई खासमा ३–४ वटा कुराले असर गर्छ । पहिलो यो बियरिस ट्रेण्डको असर हो । लगानीकर्तासँग अहिले त्यो आईपीओ किन्ने पैसा पनि छैन, जो दोस्रो बजारमा हुनुहुन्छ र जोसँग आईपीओ छ उनीहरुलाई पनि अर्को आईपीओ भर्नका लागि आफूसँग भएको त्यो आईपीओ बेच्नुपर्ने अवस्था छ । यो भने बजारको एउटा ट्रेण्ड भयो ।
दोस्रा कारण भनेको तत्कालै हामीले देखेको घोराही सिमेन्टको प्राइस पनि हो । घोराहीको प्राइस पहिलो दिनमै नेगेटिभ सर्किट लागेको थियो । खासमा घोराही, सोनापुर, अब आउने सर्वोत्तमको इन्डष्ट्री मिल्छ । अर्थात यी कम्पनीहरुको प्राइस एक्सन पनि मोटामोटी मिल्छ । र सोनापुरको सेयर मूल्यमा नेगेटिभ सर्किट लाग्नुमा मैले देखेको तेस्रो कारण भनेको सोनापुर अलिकति लार्ज क्याप कम्पनी पनि हो । ९० प्रतिशत भन्दा बढीलाई यो परेको पनि थियो । त्यसकारण पनि सप्लाई आउनु स्वभाविक भई नै हाल्यो । र अर्को कारण भनेको पछिल्लो समय नियमनकारी निकायले भकाभक प्रिमियम मूल्यमा आईपीओ जारी गर्न दिएको र यसकै कारण बियरिसमा मलजल पुगेको देखिन्छ । र सोनापुरको सेयर मूल्यमा लागेको नेगेटिभ सर्भिस नियमनकारी निकायका लागि राम्रो सन्देश पनि हो ।
अनि यस्तो बेलामा विकल्प के त ? लगानीकर्ताले के गर्ने ?
अब यसै पनि लगानीकर्ताले बजार र प्राइसले देखाएको एक्सनलाई स्वीकार्दै अगाडी बढ्नुपर्छ । र यो बेला लगानीकर्तामा मैले देखेको चाहिँ दुईवटा विकल्प छ । एउटा कि त तत्काल सेलिङ गर्नुपर्छ, आजको भोलि नै होइन भने लगानी लगभग अर्को बुलसम्मै होल्ड हुने सम्भावना छ ।
सोनापुरको सेयरलाई प्रिमियम मूल्य दिनु गलत हो भन्ने प्रमाणित भएको हो ?
अहिले प्रिमियमचाहिँ फेसन जस्तो भयो र यसलाई नियमनकारी निकायले पनि मलजल गरेको जस्तो देखियो । फण्डामेन्टल्ली हेर्दा पनि प्रिमियमका लागि डिजर्भ गर्दैनथ्यो कि जस्तो देखिन्छ । र पछिल्लो समय घोराही र सोनापुरविरुद्ध उठेको आवाजले पनि यही देखाउँछ । यसप्रति नियमनकारी निकाय पनि प्रतिकारात्मक रुपमा लाग्नुपर्छ ।
अब सोनापुरको सेयर हुनेले के गर्ने ? घाटामै बेच्ने कि केही समय कुर्ने ?
मैले चाहिँ दुईवटा विकल्प देखेको छु । पहिलो कि त अहिले जति बायर उपलब्ध छन् उनीहरुको लागि सेयर ट्रान्सफर गरिदिने । आईपीओको रेट पहिलाको जस्तो १०० रुपैयाँमा किनेर ५००, १००० पुग्ने वा बुल मार्केटमा जुन अनुभव गर्यौं त्यस्तो रहेन । त्यसैले पनि कि त सप्लाई क्याप्चर गर्ने गरी तत्काल क्विट गर्ने नत्र भने आगामी बुलसम्म कुर्नुपर्छ । बुलसम्म कुर्न सकियो भने चाहिँ आईपीओको लगानीलाई न्याय दिनेगरी बजार बढ्छ । (भिडियो)
