काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेको सांसद पद नलिम्बनमा पर्ने भएको छ । सम्पत्ति शुद्धिकरण ऐनअनुसार रविको सांसद पद स्वतः निलम्बनमा पर्ने भएको हो ।
सम्पत्ति शुद्धिकरण (मनि लाउण्डरिङ) निवारण ऐन, २०६४ (संशोधनसहित)को दफा (२७) बमोजिम रविको सांसद पद निलम्बन हुने भएको छ ।
उक्त ऐनमा थुनामा रहेको अवधिभर र निज उपर दफा २२ बमोजिम मुद्दा दायर भएमा सो मुद्दाको अन्तिम किनारा नभएसम्म राष्ट्रसेवक, कानून बमोजित स्थापित संस्थाको कर्मचारी वा पदाधिकारी स्वतः निलम्बन भएको मानिने उल्लेख छ ।
सम्पत्ति शुद्धिकरण निवारण ऐन अनुसार हाल मुद्दा दायर भएकाले उक्त मुद्दा टुंगोमा नपुग्दासम्म रविको सांसद पद निलम्बनमा परेको हो । कानूनविद्हरुका अनुसार अदालतले रविलाई उक्त मुद्दामा सफाई दिए उनको सांसद पदको निलम्बन फुकुवा हुनेछ । यदि अदालतले उक्त मुद्दामा रविलाई दोषि ठहर गरे रवि निर्वाचित चितवन क्षेत्र नम्बर २ मा पुनः उपनिर्वाचन हुनेछ ।
आइतबार जिल्ला सरकारी वकिल कार्यालय कास्कीले रविमाथि सम्पत्ति शुद्धिकरणमा २७ करोड ८९ लाख ४४ हजार ७ सय ५ मागदाबीसहित जिल्ला अदालत कास्कीमा मुद्दा दायर गरेको छ ।
