">
संवैधानिक व्यवस्थाअनुसार प्रतिनिधिसभा र प्रदेशसभा निर्वाचनमा दुई निर्वाचन क्षेत्रबाट उम्मेदवारी दिन पाइँदैन । यसअघि दुई स्थानबाट उम्मेदवारी दिने अधिकांश शीर्ष नेताले यस पटक एक निर्वाचन क्षेत्रबाट मात्रै उम्मेदवारी दिएका छन् ।
कतिपय नेता आफ्नो गृह जिल्ला र क्षेत्रभन्दा बाहिरबाट चुनावमा प्रतिस्पर्धा गर्दै छन् । निर्वाचन क्षेत्रबाट बाहिर गएर स्पर्धा गर्ने उम्मेदवारले भने आफ्ना लागि आफ्नो मत प्रयोग गर्न पाउने छैनन ।
नेकपा एमाले अध्यक्ष केपी शर्मा ओली गएको स्थानीय निर्वाचनअघि सधैँ झापामा मतदाता थिए । स्थानीय निर्वाचनअघि उनले मतदाता नामावली भक्तपुरमा सारे । ओलीले सूर्यविनायक नगरपालिकामा मतदाता नामावली सारेका छन् । तर, ओली झापा ५ बाट चुनावी मैदानमा छन् । अब उनले यस पटक आफैले आफैलाई मत दिन पाउने छैनन ।
एमालेकै वरिष्ठ नेता माधवकुमार नेपाल रौतहटको गौर नगरपालिकामा मतदाता छन् । तर, उनि पनि काठमाडौँ २ बाट उम्मेदवार छन् । नेता नेपालले पनि प्रतिनिधिसभा निर्वाचनमा आफैँलाई मत दिन नपाउने नेतामा परेका छन् ।
काठमाडौँ १ बाट निर्वाचनमा प्रतिस्पर्धा गर्न लागेका नेकपा माओवादी केन्द्रका युवा नेता अनिल शर्माको मतदाता नामावली रुकुममा छ । तर, शर्मा काठमाडौँको चुनावी मैदानमा छन् । शर्माले आफ्नो मतदाता नामावली गृह जिल्लामै कायम रहेको बताए । उनले पनि आफूलाई मत दिन पाउने छैनन ।
काठमाडौँ २ का मतदाता रहेएका पूर्वसभामुख दमननाथ ढुङ्गाना यस पटक नेपाली काँग्रेसको तर्फबाट भक्तपुर २ मा चुनावी मैदानमा छन । ढुङ्गानाले पनि आफैलाई मत दिन पाउने छैनन् । ढुङ्गाना दुई दशकपछि चुनावी मैदानमा उत्रिएका हुन् ।
रोल्पा नगरपालिकामा मतदाता रहेका माओवादी केन्द्रका नेता कृष्णबहादुर महरा पनि दाङबाट चुनाव लड्दै छन् । महराले पनि आफैलाई मतदान गर्न पाउनेछन् । महरा दाङ २ मा वाम गठबन्धनका तर्फबाट उम्मेदवार हुन । काठमाडौँ ६ का मतदाता रहेका माओवादी केन्द्रका नेता हितमान शाक्य पनि अहिले काठमाडौँ १० को चुनावी मैदानमा छन् ।
दोलखा बैत्यश्वर गाउँपालिकामा मतदाता रहेका एमाले पोलिटब्युरो सदस्य पशुपति चौलागाईँ पनि यस पटक आफ्नो क्षेत्रमा उम्मेदवार हुन । चौलागाईँ यस पटक प्रदेशसभाको ‘ख’बाट चुनावी मैदानमा छन् । उनि मतदाता रहेको बैत्यश्वर प्रदेशसभाको ‘क’मा पर्छ । उनले पनि आफूलाई मतदान गर्न पाउने छैनन ।
राष्ट्रिय जनता पार्टीका अध्यक्ष मण्डलका संयोजक महन्थ ठाकुरले स्थानीय चुनावमा मतदान गरेनन् । तर, उनको मतदाता नामावली सर्लाहीको बलरा नगरपालिकामा छ । ठाकुर यस पटक महोत्तरी ३ बाट चुनावमा प्रतिस्पर्धा गर्दै छन् ।
सर्लाहीको चन्द्रनगर गाउँपालिकाका मतदाता रहेका राजपा नेता राजेन्द्र महतो धनुषाबाट निर्वाचनमा प्रतिस्पर्धा गर्दै छन् । महतो धनुषा २ मा काँग्रेसका विमलेन्द्र निधिसँग चुनावी मैदानमा छन् । महतोले पनि आफैलाई मत दिन पाउने छैनन ।
यस्तै एमाले सविच समेत रहेका योगेश भट्टराई यस पटक काठमाडौँबाट ताप्लेजुङमा उम्मेदवार बनेका छन् । काठमाडौँ ६ का मतदाता रहनुभएका भट्टराईले स्थानीय निर्वाचनमा डिल्लीबजार कन्या क्याम्पसबाट मतदान गरेका थिए । अहिलेसम्म उनको नामावली काठमाडौँमै छ ।
माओवादी केन्द्रका नेता देव गुरुङको मतदाता नामावली मनाङको नासोङ गाउँपालिकामा छ तर प्रतिनिधिसभामा गुरुङ लमजुङबाट काँग्रेसका दिलबहादुर घर्तीसँग प्रतिस्पर्धामा छन् । गुरुङले पनि आफूले आफैलाई मत दिन पाउने छैनन् । गोरखापत्र दैनिकले समाचार छापेको छ ।
