">
- अर्थ सरोकार संम्वाददाता
काठमाण्डौ – विराटनगर नाकाबाट चालु आर्थिक वर्षको पुस मसान्तसम्ममा आयात बढेको मूख्य १५ वस्तुमध्ये ५ मात्र व्यापारिक सामग्री छन्। विराटनगर भन्सार कार्यालयका अनुसार अन्य १० वस्तु औद्योगिक कच्चा पदार्थ हुन् ।
व्यापारिक मालवस्तुभन्दा औद्योगिक कच्चा पदार्थ बढी पैठारी हुने नाकाका रूपमा चिनिएको विराटनगर भन्सारले यस वर्ष पनि परम्परालाई निर्वाह गरेको पाइएको छ ।
गत वर्ष नाकाबन्दीका कारण वीरगञ्ज र भैरहवा भन्सार तथा भूकम्पले तातोपानी भन्सार बन्द हुँदा विराटनगर नाकाबाट गरिने आयातले स्वदेशी उद्योग–व्यापार र अर्थतन्त्र धानेको थियो । तर नाकाबन्दीपछि वीरगञ्ज र भैरहवा दुबै भन्सार सुचारु भए पनि विराटनगरबाट गत वर्षको भन्दा बढी परिमाणमा आयात हुने क्रम यथावत छ ।
कार्यालयका अनुसार स्टील ुवायर रड इन क्वायल एण्ड एमएसु चालु आर्थिक वर्षको ६ महिनामा २ अर्ब ४० करोड ३० लाख मूल्य बराबरको आयात भएको छ।गत वर्षको यही अवधिमा १ अर्ब २७ करोड ५८ लाख मूल्य बराबरको स्टीलजन्य पदार्थको कच्चा पदार्थ आयात भएको थियो।
विभिन्न प्रकारका तार र काँटीको उत्पादनमा प्रयोग गरिने कच्चा पदार्थको आयातबाट गत वर्षको भन्दा १९ करोड १९ लाखले राजस्व बढेको छ।
फलामे छड बनाउन प्रयोग गरिने कच्चा पदार्थ एमएस बिलेटको पनि आयातमा वृद्धि भएको छ ।चालु आर्थिक वर्षको ६ महिनामा २ अर्ब ३३ करोड ४७ लाख मूल्य बराबरको विलेट आयात भएको छ।
गत वर्षको सोही अवधिमा १ अर्ब ३० करोड ७८ लाख मूल्य मूल्य बराबरको विलेट आयात भएको थियो। विगत छ महिनामा गरिएका मुख्य आयातको तेस्रो स्थानमा भने हाइस्पिड डिजल छ । डिजललाई मुख्यतः व्यापारिक वस्तु मानिए पनि औद्योगिक कच्चा पदार्थ र सहायक कच्चा पदार्थका रूपमा पनि प्रयोग गरिन्छ ।
चालु ६ महिनाको अवधिमा ३ अर्ब ३५ करोड ११ लाख बराबरको डिजल आयात भएको छ।गत वर्षको सोही अवधिमा २ अर्ब २५ करोड ३४ लाख बराबरको डिजल आयात भएको थियो।आयात बढेका अन्य व्यापारिक वस्तुमा पेट्रोल, मोटरको ब्याट्री, सुकुमेल र मोबाइल टेलिफोन छन् ।
औद्योगिक कच्चा सामग्रीमा पर्ने सूर्यमुखीको कच्चा तेल, मदिराको कच्चा पदार्थ, सिआर सिट, एलपी ग्यास, बेस आयल, फलामे पाता र रङ तथा पेन्टसको कच्चा पदार्थको पनि आयात बढेको छ।
नेपालको मूख्य बजार काठमाडौ भएकाले विराटनगर नाकाबाट आयातीत व्यापारिक सामग्रीभन्दा वीरगञ्ज र भैरहवा नाकाबाट पैठारी गरिएका सामग्री राजधानी पु¥याउन सजिलो र सस्तो पर्छ।विराटनगरबाट व्यापारिक मालवस्तु भन्दा कच्चा पदार्थ बढी आउने गरेको मोरङ व्यापार संघका सल्लाहकार एवं पूर्व अध्यक्ष अविनाश बोहराले बताए ।
