• सुरज प्याकुरेल / अर्थ सरोकार डटकम 

काठमाडौँ- एनआइसी एसियाको ‘स्वीफ्ट’ ह्याक प्रकरण यति बेला चर्चामा छ । नेपाल राष्ट्र बैंकको अनुसन्धान जारी रहँदा विभिन्न खाले चर्चा परिचर्चा त चलेका छन् नै, विभिन्न अफवाहरु पनि फालिएका छन् । आखिर भएको के हो ? हामीले एनआइसी एसिया बैंकका सुचना अधिकारी र सिए रोशन न्यौपानेसँग कुराकानी गरेका छौं ।

१. स्वीफ्ट ह्याक प्रकरणबारे विभिन्न चर्चा सुनिएको छ । खास भएको के हो ?

बैंकमा विभिन्न खाले सर्भर हुन्छन् । ती मध्ये एउटा ‘कोर बैंकिङ’को सर्भर हुन्छ । अर्को स्वीफ्टको सर्भर पनि हुन्छ। अन्यखाले सर्भर पनि हुन्छ । अहिले हाम्रो कोर बैंकिङ सर्भर र अन्य सर्भरमा केहि समस्या छैन । सबै ठाउँमा राम्रोसँग बैंकिङ कारोबार भइरहेको छ । स्वीफ्ट सर्भरमा भने केहि शंकास्पद कुराहरु भएको आशंकामा हामीले अहिले अनुसन्धान जारी राखेका छौं । यहि अनुरुप अहिले हामीले स्वीफ्ट डाउन गरेर थप अनुसन्धान गरिरहेका छौं ।

२. बैंकले आफ्नो आधिकारिक धारणा कहिले र कसरी सार्वजनिक गर्छ ?

अनुसन्धान सकिएपछि प्रतिवेदन सहित हामी हाम्रो धारणा सार्वजनिक गर्छौं । हामी पत्रकार सम्मेलनमार्फत जानकारी गराउने तयारीमा छौं । अहिलेको ध्यान भनेको चाहिं सर्भरलाई नियमित चालु गराउनमा बढी छ । केहि शंकास्पद कार्यहरु भएको बारे अनुसन्धान चलिरहेको छ । एउटा निष्कर्ष सहित हामी सबैलाई भएको के हो भन्ने स्पष्ट जानकारी गराउँछौं ।

३. अनुसन्धान कसले र कसरी गरिरहेको छ ?

हामीले यो अनुसन्धानमा नेपालका विज्ञहरु पनि राखेका छौं । नेपाल राष्ट्र बैंकको टोलीले पनि अनुसन्धान गरिरहेको छ । त्यतिमात्र होइन भारतको केपीएमजीबाट पनि हाम्रो विज्ञहरुको टोली झिकाएका छौं । अनुसन्धानका केहि प्रारम्भिक नतिजाहरु आइसकेको पनि छ । हामी अनुसन्धान प्रक्रिया पूरा गरेर यसलाई सार्वजनिक गर्छौं । अन्तराष्ट्रिय कारोबार पनि सुरु गर्नु पर्ने हुनाले हामीले द्रुत गतिमा काम अगाडी बढाएका छौं ।

४. ग्राहकका पैसा चोरी भएकि भन्ने भ्रम पनि छ नि जनतामा ?

त्यस्तो भ्रम नपाले हुन्छ । ‘स्वीफ्ट’ भनेको ग्राहकको पैसासँग सम्बन्धित सर्भरनै होइन । ग्राहकको पैसा हुने भनेको त लोकल सर्भर हो । बैंकिङ सर्भर अर्थात हाम्रो बैंकको केसमा हामी ‘फिनेकल’ प्रयोग गर्छौं । फिनेकलमा ग्राहकको रकम हुन्छ । ग्राहकका पैसा चोरी भएकी, भन्ने कुराहरु अफवामात्र हुन् । यसमा सबैजना ढुक्क भए हुन्छ ।

५. बैंकको यत्रो प्रकरण पर्दा बैंकका सीइओ देखिनु भएन नि ? उहाँ कहाँ हुनुहुन्छ ?

उहाँ विदामा अमेरिका हुनुहुन्थ्यो । त्यहि बेला यस्तो घटना घट्यो । उहाँ केहि दिनमै नेपाल फर्कंदै हुनुहुन्छ ।