">
बेइजिङ । चीनले सिन्जियाङमा लाखौं अल्पसंख्यक उइगर मुस्लिमहरुलाई हिरासतमा राखेर यातना दिइरहेको छ । यातना शिविर भएको उक्त क्षेत्रमा चीनले धार्मिक र सांस्कृतिक सफायाअन्तर्गत मानिसहरुलाई नियन्त्रणमा लिएर यातना दिने काम गरिरहेको छ । फ्रान्सबाट पक्राउ गरेर चीनको सिन्जियाङमा हिरासतमा राखिएको एक महिला हिरासत मुक्त भएपछि यातना शिविरमा भोगेका पीडाहरुलाई आफ्नो पुस्तकमार्फत सार्वजनिक गरेकी छन् । उनलाई फ्रान्सबाट नियन्त्रणमा लिइयो, उनलाई सोधपुछ मात्रै गरिएन, चरम दुर्व्यवहारसमेत गरियो ।
उनले बेइजिङले सञ्चालन गरिरहेको हिरासत शिविरहरुमा बाह्य संसारजस्तो जीवन–मृत्यु नहुने आफ्नो पुस्तकमा लेखेकी छन् । चीनले उक्त शिविरहरुलाई पुनर्शिक्षा शिविरको नाम दिएको छ । उक्त हिरासतमा तीन वर्ष बिताएकी गुलबहार हाइटीवाजीले भनिन्, ‘बाहिर संसारमा भएजस्तो जीवन र मृत्यु हिरासत शिविरमा भने छैन । सयौं पटक मर्नुपर्छ । जब शिविरमा रहेका गार्डहरुले हामीलाई लात्ताले हिर्काउछन्, त्यो पीडा अहिले बयान गर्न सकिँदैन ।’ गुलबहार हैतिवाजी आफ्नो पुस्तकमा लेख्छिन्, ‘जब त्यहाँ रहेका गार्डले एक हातले मेरो कपाल तानेर पर्छाछन् र अर्को हातले मेरो पाखुरा समात्छन् अनि म आँखा बन्द गर्छु र मृत्यु भएको महसुस गर्छु ।’
जनवरी १३ मा फ्रान्समा उनको पुस्तक सार्वजनिक गरिएको हो । दुई छोरीकी आमा रहेकी उनले भोगेको यातना, भोक, जबरजस्तीको बाँझोपन र जबरजस्तीकरणीबारे उल्लेख गरेकी छन् । बेइजिङले २०१७ मा आतंककारी गतिविधि नियन्त्रणमा लिने अभियानस्वरुपमा त्यहाँ मानिसहरुलाई हिरासतमा राख्न सुरु गरेको थियो । ‘आतंकवादको बिरूद्ध युद्ध’ को आडमा हाल सिन्जियाङमा योजनाबद्धरुपमा नरसंहार अभियान चलिरहेको छ । पेसाले इन्जिनियर रहेकी हाइटीवाजीले मानिसहरु बेपत्ता भएको र चीनले मानवअधिकारविरोधी गतिविधि गरेको भनेपछि पक्राउ परेकी थिइन् ।
