• समाचार टिप्पणी

हत्या, बलात्कारजस्ता जघन्य फौजदारी अभियोग लागेका पत्रकार सम्मेलनमार्फत सार्वजनिक गरिंदासमेत उनीहरुको अनुहार देखाईदैन । किनकि प्रचलित कानुनले उसलाई अभियुक्त बनाएको हुन्छ, अपराधी सावित गरिसकेको हुँदैन । अपराधी ठहर नहुँदासम्म उसका कतिपय अधिकारहरुको रक्षा गरेर उसको अनुहार छोपेर उनलाई सार्वजनिक गरिन्छ । तर एउटा कम्पनी, जहाँ लाखौँ लगानीकर्ताको करोडौं रुपैयाँ लगानी परेको छ, उसले गलत गर्यो भनेर अनुसन्धान अगावै नाम नै किटेर ती कम्पनीहरु जोखिमयुक्त भनिनु पक्कै पनि लगानीकर्ताको भावनामाथि नमिठो खेलबाड त हुँदै हो, समग्र धितोपत्र बजारको अहित हुनेगरी गरिएको दुष्कर्मको पराकाष्टा हो ।

नेपाल धितोपत्र बोर्ड नियामक हो । त्यसैले उसले कम्पनीमा भएका गलत कामका बारे अनुसन्धान गर्न पाउँछ । गर्नुपर्छ पनि । तर आफ्ना नजिकका मान्छेको कम्पनीमा गलत काम भएको छ भनेर प्रमाणसहित लिखित उजुरी पर्दा पनि मतलब नगर्ने धितोपत्र बोर्डलाई अहिले के आइपर्यो त्यस्तो, कि अनुसन्धान नै नभई यी कम्पनी जोखिमपूर्ण छन् भनिदिन ?

केहि समय अगाडी एक ठुला लगानीकर्ताले अर्थ सरोकार टेलिभिजन कार्यक्रममा अन्तर्वार्ताका क्रममा केहि राम्रा कम्पनी पनि स्क्रिप्ट तोकिदिंदा, धितोपत्र बोर्डको टाउको दुखेको थियो । तर अहिले उसैले यी कम्पनीहरु नराम्रा छन् वा जोखिमपूर्ण छन् भन्न मिल्छ ? यो त बदमासीको पनि हद भएन र ? अर्कोतर्फ जुन जुन कम्पनीको नाम ५१ वटा कम्पनीको लिष्टमा परेका छन्, तीमध्ये कुनै कम्पनी सार्है राम्रा कम्पनी पनि छन् । घोडीघोडा लघुवित्तजस्ता कम्पनी बिगत लामो समयदेखि कारोबार भएका छैनन् भने तीनमा कसरी चलखेल भयो ? मनपरी गर्ने ? मनपरी लेख्ने ? मनपरी बोल्ने ? धितोपत्र बोर्डजस्तो जिम्मेवार संस्थासँग अलिकति नैतिकता भन्ने कुरा हुनुपर्दैन ?

बोर्डको विज्ञप्ति पहिला आफ्नालाई सेयर बेच्न लगाएर आएको प्रष्ट हुन्छ । बोर्डको अध्ययनबारे विज्ञप्ति सार्वजनिक हुनुअगावै संचारमाध्यममा समाचार आउनु, बोर्डको विज्ञप्ति आउने सूचना पाएर फाइनान्स सेक्टरमा प्यानिक सेल देखिनु त्यसका प्रमाणहरु हुन् । के यो चाहिं बोर्ड आफैंले गरेको इन्साइडर ट्रेडिङ भएन र ? बोर्डका अधिकारीहरुलाई चाहिं जे बोल्न पनि छुट हो ? जे गर्न पनि छुट हो ?

आम नागरिकको शंका छ, माफियाबाट मज्जाको दानापानी पाएर बोर्डका अधिकारीले यस्तो विज्ञप्ति निकालेको हो । कर्नरिङ गर्नेहरुले त विज्ञप्ति आउने सूचना पहिला नै पाईसकेका थिए र सोहि दिन सेयर बेचिसके । अव फस्ने नयाँ लगानीकर्ता न हुन् । अनि के धितोपत्र बोर्ड ठुला खेलाडी र माफियाहरुको मात्र संस्था हो ? के नयाँ लगानीकर्तामारा हो धितोपत्र बोर्ड ?

अनुत्तरित प्रश्नहरु धेरै छन् । रहस्यको गर्भमा बसेका तथ्यहरु धेरै छन् । ठुला खेलाडीबाट महँगो रकम असुलेर यो विज्ञप्ति आएको हुनसक्ने लगानीकर्ताको शंका गलत हो भन्न सकिने अवस्था छैन । त्यसैले छानविन गलत गर्ने कम्पनीहरुको भन्दा पहिला धितोपत्र बोर्डका अधिकारीहरुको सम्पत्तिमाथि गरिनुपर्छ । आम लगानीकर्ताले लगानी गरेको कम्पनीलाई ठाडै अनुसन्धान नगरी जोखिमयुक्त भन्नेलाई कारवाही हुनुपर्छ ।

त्यसैले आम लगानीकर्ताहरुले आज प्यानिक सेल नगरौं । धितोपत्र बोर्डलाई बोर्डले गरेको चलखेलले लगानीकर्ताहरु हतोत्साहित हुँदैनन् भन्ने बुझाईदिउँ ।