सरकारले चलाउनुपर्ने राष्ट्र, व्यापारी र कालोबजारीले चलाउंदा जनतालाई मर्नु न बाँच्नुको स्थिति आएको छ । यसपालीको तिहारले पनि यस्तै सन्देश  दिएर गयो । यसपाली तिहारमा बजार घुमियो ।
तिहारमा दाजुभाइलाई उपहार स्वरुप दिन भाइमसला, मिठाई र फलफुल किन्नेहरुको चाप थियो । सप्तरंगी टीका बेच्ने पनि उत्तिकै थिए । किन्नेको पनि कमि हुने कुरै भएन । स्टल नै पिच्छे भाइमसला बेच्न राखिएको थियो । ओहोरदोहोर गर्ने मानिसहरुलाई भने निकै कठिनाइको सामना गराएर महंगीको महँगो व्यापार चलिरहेकै थियो ।

सामान त जतिपनि छन् तर मँहगीले पनि साथ छोडेको छैन । बजारमा सामानको भाउ सोध्ने हो भने कतिपयको त सातो उड्लाझैं थियो बजारको महंगी रौनक । बिहान कमाएर बेलुका छाक टार्नेले त सामान छुन पनि नसक्नेगरी मँहगी बढेको छ बजारमा आजकल । पसल नै पिच्छे सामानको मुल्य फरकफरक हुने नै भयो। सरकारले गति जो छाडेको छ ।

यसपालीको तिहारमा किनमेलमा निस्कनेहरुलाई थाहा छ- हरेक सामानको मुल्य दोब्बर भएको छ । फूल र मालामा चर्को मुल्यवृद्धि भएको छ । मँहगीले जनताको ढाड सेकेको छ तर सरकार भने मौन छ । बजार अनुगमनमा सम्बन्धित निकायको ध्यान गएको छैन । अनुगमन गरेजस्तो गरेर कमिसन  सुलं पल्केकाहरु कालो बजारियाले दिएको कालो पदार्थ पिउन मै व्यस्त भए ।  बजार मँहगीसंग सामानको भाउ दाज्ने हो भने साधारण रुपमा एक जना दाजुभाइलाई टीका लगाँउदा पाँच हजार ररुपैयाँ खर्च हुने देखियो बजारमा ।

कसैले पनि पैसाको लागि टिका लगाउदैनन् । तर सामान खरिद गर्न त पैसा चाहिन्छ नै । चाडबाडको मौका छोपेर मिठाइ पसलेहरुले गुणस्तरहीन सामान बिक्री गरिरहेको छन् । खानयोग्य नभएको मिठाई बेचेका छन् मिठाइ पसलेले अनि पैसा पनि मनलाग्दी लिएको छन् । मिठाई बनाउने ठाँउ कसैले देखेको छ ? मिठाई बनाउने ठाँउ निकै नै फोहोर र सफासुग्घरहीन छन् । मिठाई बनाउन प्रयोग हुने भाँडाकुँडा पनि महिनौदेखि नमाझिएका जस्तो देखिन्छ । ब्रान्डेड भनिएका मिठाइ पसलमा पनि यस्तै रमिता थियो तिहारका बेला । के गर्ने ? सरकारले आँखा देखेर पनि आँखा चिम्लिएपछी…

उपभोक्ता मञ्चका नेताहरु जनता हाम्रो लागि देउता हुन् भन्दै ठुल्ठुला भाषण गर्छन् । जुनचाहि व्यापारीहरुले मञ्चका नेताहरुलाई पैसा दिएन, त्यो व्यवसायीकोमा मात्रै छापा मार्छन् । जनता ठग्ने व्यापारीबाट पैसा पाइपछि यिनीहरुले त्यस्ता व्यापारीलाई खुल्ला छोडिदिन्छन् । पैसा नपाउञ्जेल मात्रै हुन् अनुगमन गर्ने पैसा पाइसकेपछि अनुगमन टोली र उपभोक्ता मञ्चका नेताहरु आफैं बिलाउछन् । अनुगमन टोली र उपभोक्ता मञ्चका नेताहरु बिक्दा पनि मँहगीले सीमा नाघिसकेको छ । गरिब जनता मँहगीको भार थेग्न नसकेर मर्नपर्ने स्थिति आएको छ ।

पहिलेपहिले दिदीबहिनीहरुले दाजुभाइलाई टीका लगाउन चाहिने सामान सबै आफ्नै घरमा तयार पार्थे । सेलरोटीदेखि लिएर फुलका मालाहरु सबै आफ्नै घरमा बन्थ्यो । अरु केही नभएपनि कोसेलीस्वरुप डालाभर सेलरोटी बोकेर जान्थे । टीका लगाउने दिन दाजुभाइलाई खाना खुवाउन चामलसहित आफ्नै घरबाट लिएर जान्थे । आफ्नै घरदेखि तरकारी चामल लिएर माइती पुग्थे दिदीबहिनी । त्यतिखेर आफुले जे सकिन्छ त्यही खुवाउनपर्छ भन्ने मान्यता थियो । दिदीबहिनीहरुले पनि टीका लगाइदिए बापत दक्षिणाको आश गर्दैनथिए । पछिल्लो केही वर्षयता, दिदीबहिनीले टीका लगाउन सामान किन्दा उठेको पैसा पनि दक्षिणा पाइएन भन्ने गुनासोहरु सुनिन्छ । यसको कारण बढेको महंगी पनि पक्कै हो ।

केही वर्षअघिदेखि व्यापारीहरुले थोरथोर सामान हालेर मसलाका प्याकेट बनाउने र जनता ठग्ने काम गरिरहेको छन् । फलफूल, दुग्ध जन्य पदार्थ, माछामासु पसले हरुले पनि आफुखुसी भाउ रोखर जनता ठगेका छन् । व्यापारीहरु आफु कमाउने अनि दिदीभाइका सम्बन्ध बिगार्ने र चाड संकटमा पारिदिने काम गरिरहेको छन् । नेपाल सरकार र हामी जनताले व्यापारीको पोलेसी बुझनौ भने चाडबाड नै संकटमा पर्छ ।

जताततै महँगी, जताततै लुट !

व्यापारीलाई जे गर्न पनि नेपालमै रहेछ छुट !

र त यसपालीको तिहारले नागरिकका लागि एउटा सन्देश छोडेर गएको छ

‘देश त माफियाको हातमा पुगिसकेछ’ जनताले सरकारको अनुभूति सम्झिनी, पानी छाम्किनी…!