काठमाडौं । नेपाल राष्ट्र बैंकले पुनरकर्जा कार्यविधि, २०७७ मा कडाई गरेको छ । राष्ट्र बैंकले पुनरकर्जा कार्यविधि, २०७७ मा चौथो संशोधनमार्फत कडाई गरेको हो । उच्च आयात तथा रेमिट्यान्स आप्रवाहमा कमी आएसँगै अर्थतन्त्र नै समस्यामा जाने देखिएपछि पुनरकर्जा कार्यविधिमा कडाई गरेको हो ।
राष्ट्र बैंकले ३ प्रकारका पुनरकर्जा दिँदै आएको छ । जसमा विशेष पुनरकर्जा, साधारण पुनरकर्जा र लघु, घरेलु तथा साना उद्यम पुनरकर्जा रहेका छन् । उक्त कार्यविधिअनुसार राष्ट्र बैंकले पुनरकर्जाको ब्याजदर बढाएको छ ।
केन्द्रीय बैंकले यसअघि बैंक तथा वित्तीय संस्थालाई विषेश पुनरकर्जा १ प्रतिशतमा दिँदै आएको थियो भने अहिले बढाएर ३ प्रतिशत पुर्याएको छ । यता ऋणीले भने बैंकलाई ५ प्रतिशत ब्याज तिर्नुपर्नेछ । राष्ट्र बैंकले साधारण पुनरकर्जामा बैंक तथा वित्तीय संस्थालाई लिने ब्याज भने ३ प्रतिशतले बढाएर ५ प्रतिशत र बैंकले ऋणीसँग लिने ब्याज ५ प्रतिशतबाट बढाएर ७ प्रतिशत पुर्याएको छ ।
लघु, घरेलु तथा साना उद्यम पुनरकर्जाको ब्याज भने २ प्रतिशतबाट बढाएर ४ प्रतिशत पुर्याएको छ । यस्तै बैंकले ऋणीसँग लिने ब्याज ५ प्रतिशतबाट बढाएर ७ प्रतिशत पुर्याइएको छ । राष्ट्र बैंकले दुई आर्थिक वर्षको औसत रिटर्न अन इक्यूटी ३ प्रतिशतभन्दा बढी रहेका उद्योग व्यवसायका लागि पुनरकर्जा रोकेको हो ।
