काठमाडौं । नेपाल राष्ट्र बैंकले चालु आर्थिक वर्ष लागेपछि ४१ अर्ब ८६ करोड बराबरको ट्रेजरी बिल खरिद गरेको छ । नवीकरणका लागि बोलकबोल गरेको ट्रेजरी बिलको ब्याजदर दोहोरो अंकमा पुगेपछि राष्ट्र बैंक आफैँले खरिद गरेर ब्याजदरमा हस्तक्षेप गरेको हो ।
साउन पहिलो साता मौद्रिक नीति सार्वजनिक गरेको राष्ट्र बैंकले बैंकदरमा वृद्धि गर्नुको साथै राष्ट्र बैंकबाट पाउने तरलता सुविधामा पनि कडाइ गरेको थियो । त्यसपछि बैंकहरुले अल्पकालीन ब्याजदर (ट्रेजरी बिलको ब्याजदर) बढाएर १४ प्रतिशतसम्म पुर्याएपछि राष्ट्र बैंकले हस्ताक्षेप गरेर एकल अंकमा झारेको थियो ।
मौद्रिक नीति अगाडि २ साउनमा बोलकबोल भएको ट्रेजरी बिलको औसत ब्याजदर एकल अंकमा थियो । तर, १० साउनमा भएको बोलकबोलमा १४ प्रतिशत ब्याजदर पुर्याउँदा पनि राष्ट्र बैंकले स्वीकार गरेपछि त्यसपछि लगातार राष्ट्र बैंक आफैंले खरिद गरेर एकल अंकमा झारेपछि भदौ २७ मा भएको बोलकबोल भने सबैं बैंकहरुलाई नै नवीकरण गरेको थियो ।
राष्ट्र बैंकले असोज २ गते आइतबार २८ दिन, ९१ दिन र १८२ दिन अवधिको ट्रेजरी बिल नवीकरणका लागि बोलकबोल गरेको थियो । जसमध्ये २८ दिन अवधिको २ अर्बको ट्रेजरी बिल बोलकबोल गरेको थियो । २ अर्ब नै बैंकहरुलाई नवीकरण गरिएको छ । जसको डिस्काउन्ट रेट न्यूनतम ८.७८०६ प्रतिशत र अधिकतम ९.१९९७ प्रतिशत तथा औसत ८.९३३५ प्रतिशत कायम भएको राष्ट्र बैंकले जनाएको छ ।
यस्तै आइतबार नै ९१ दिनको ५ अर्ब ५३ करोड बराबरको ट्रेजरी बिल नवीकरणका लागि बोलकबोल भएको थियो । जसमध्ये २ अर्ब ४२ करोड राष्ट्र बैंकले नै खरिद गरेर ३ अर्ब ११ करोड बैंकहरुलाई नवीकरण गरिएको छ । जसको डिस्काउन्ट रेट न्युनतम ८.९९० र अधिकतम ११.२२१८ प्रतिशत तथा औसत ९.८७४७ प्रतिशत कायम भएको छ ।
आइतबार नै बोलकबोल भएको १८२ दिन अवधिको ४ अर्ब ३० करोडको ट्रेजरी बिल नवीकारणका लागि बोलकबोल भएकोमा २ अर्ब ३९ करोडको राष्ट्र बैंकले नै खरिद गरेर १ अर्ब ९१ करोड मात्रै बैंकहरुलाई नवीकरण गरेको छ । जसको डिस्काउन्ट रेट न्यूनतम ९.१ प्रतिशत र अधिकतम ९.९९०१ प्रतिशत कायम हुँदा औसत ९.६६७६ प्रतिशत कायम भएको छ ।
आइतबारको बोलकबोलमा ब्याजदर पुनः डबल डिजिटमा पुग्ने अवस्था भए पछि राष्ट्र बैंकले नै खरिद गरेको छ । ट्रेजरी बिलको ब्याजदर बढ्दा सरकारको खर्च बढ्न भएकोले पनि राष्ट्र बैंकले ट्रेजरी बिलको ब्याजदर नियन्त्रण गर्न आफैंले खरिद गरिरहेको छ ।
