काठमाडौं । सरकारले कर्मचारीहरुको तलब तथा दशैँ भत्ता निकासा गर्न थालेपछि सरकारी खाता ऋणात्मक हुन थालेका छन् । आम्दानीभन्दा खर्च बढेपछि सरकारी खाता ३५ अर्व रुपैयाँले ऋणात्मक भएको छ ।
महालेखा कार्यालयका अनुसार सोमबारसम्म सरकारको कुल प्राप्ति १ खर्ब ९६ अर्ब रुपैयाँ रहेको छ भने राजस्व १ खर्ब ६७ अर्ब रुपैयाँ उठेको छ । जसमध्ये कर राजस्व १ खर्ब ६७ खर्ब रुपैयाँ उठेको छ भने गैर कर राजस्व १४ अर्ब रुपैयाँ उठेको छ । सरकारले ६ करोड रुपैयाँ अनुदान प्राप्त गरेको छ ।
त्यस्तै, सरकारले चालु वर्ष ४९ अर्ब रुपैयाँ प्राप्त गर्ने अनुमान गरेको छ । अन्य शिर्षकमा १४ अर्ब रुपैयाँ प्राप्त गरेको छ । सरकारको सोमबारसम्मको खर्च २ खर्ब ३२ अर्ब रुपैयाँ पुगेको छ । यो कुल लक्ष्यको १३.२९ प्रतिशत हो । सबैभन्दा बढी चालु शिर्षकमा १ खर्ब ७३ अर्ब रुपेयाँ खर्च भएको छ । यो कुल अनुमानको १३.२९ प्रतिशत हो ।
पुँजीगत खर्च ११ अर्ब रुपैयाँ भएको छ । यो कुल लक्ष्यको ३.८६ प्रतिशत हो भने वित्तीय व्यवस्थापनका लागि ४७ अर्ब रुपैयाँ खर्च भएको छ ।
यता, अर्थ मन्त्रालयका सहसचिव धनिराम शर्माले आर्थिक वर्षको पहिलो त्रैमास आम्दानीभन्दा खर्च धेरै हुने भएकाले ऋणात्मक बनेको बताएका छन् । उनका अनुसार अप्ठ्यारो अवस्था छैन । तर राजस्वमा आएको संकुचनले खर्च धान्न कठिन हुँदै गएपछि आन्तरिक ऋण उठाउने क्रमलाई तीव्रता दिएको छ ।
सरकारले यो आर्थिक वर्ष २ खर्ब ४० अर्ब रुपैयाँ आन्तरिक ऋण उठाउने लक्ष्य लिएकोमा अढाइ महिनामै ७२ अर्ब ३१ करोड रुपैयाँ उठाइसकेको छ ।
