काठमाडौँ । काठमाडौँ महानगरपालिकाले राष्ट्रिय प्रजातन्त्र पार्टी (राप्रपा)लाई एक लाख जरिवाना गरेको छ ।
पूर्वराजा ज्ञानेन्द्र शाहको स्वागतका क्रममा आयोजना गरिएको कार्यक्रममा सहभागी व्यक्तिहरुले सडक फोहोर गरेको भन्दै महानगरले राप्रपालाई कारवाहीस्वरुप एक लाख रुपैयाँ जरिवाना गरेको हो ।
महानगर क्षेत्रभित्र पर्ने एयरपोर्ट, तिलगंगा, गौशाला लगायत सार्वजनिक क्षेत्रका सडक, सडकपेटी तथा आइल्याण्ड र त्यसमा रहेका बिरुवा साथै रेलिङमा भौतिक क्षति गरेको र जथाभावी फोहोर गरेको भन्दै जरिवाना गरिएको महानगरले जनाएको छ ।
राप्रपालाई वातावरण प्रदूषण गरेकोले फोहरमैला व्यवस्थापन ऐन, २०६८, काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७ र काठमाडौँ महानगरपालिकाको आर्थिक ऐन, २०८१ बमोजिम एक लाख रुपैयाँ जरिवाना गरिएको महानगरले जनाएको छ ।
