काठमाडौँ । सरकारले चालु आर्थिक वर्ष २०८०/८१ को पहिलो त्रैमासमा ८० अर्ब आन्तरिक ऋण उठाउने तयारी गरेको छ । यसअघि पहिलो त्रैमासमा ५५ अर्ब आन्तरिक ऋण उठाउने तयारी गरेको सरकारले त्यसमा परिमार्जन गर्दै ८० अर्ब आन्तरिक ऋण उठाउने तयारी गरेको हो ।
यसो त सरकारले लिएको ८० अर्ब आन्तरिक ऋणको लक्ष्यमध्ये हालसम्म नेपाल राष्ट्र बैंकले ६४ अर्ब रुपैयाँ आन्तरिक ऋण उठाइसकेको छ ।
चालु आर्थिक वर्षको पहिलो त्रैमासमा पनि राजस्वमा दबाब परेपछि आन्तरिक ऋणको लक्ष्य परिमार्जन गर्नुपरेको अर्थ मन्त्रालय स्रोतले बताएको छ । स्रोतका अनुसार सरकार लक्ष्यअनुसारको आन्तरिक ऋण उठाउन लागि परेको छ । पहिलो त्रैमासमा कुनै पनि हालतमा ८० अर्ब आन्तरिक ऋण उठ्ने मन्त्रालय स्रोतको दाबी छ ।
हुन त सरकारले यसभन्दा अघिल्ला वर्षको पहिलो त्रैमासमा पनि आन्तरिक ऋण उठाउँदै आएको थियो । तर, यसवर्ष सरकारले लिएको आन्तरिक ऋणको लक्ष्य भने आक्रामक रहेको स्वयम् अर्थमन्त्रालयका अधिकारीहरू बताउँछन् । सरकारले चालु आर्थिक वर्षको बजेटमा खर्चका लागि १७ खर्ब ९३ अर्ब ८३ करोड ७३ लाख रुपैयाँ स्रोत जुटाउनुपर्ने उल्लेख छ । जसमध्ये २ खर्ब ४० अर्ब रुपैयाँ आन्तरिक ऋणमार्फत व्यवस्थापन गर्ने उल्लेख गरिएको छ ।
राजस्व संकलनमै दबाब परेपछि सरकारले खर्च व्यवस्थापन गर्नका लागि भए पनि पहिलो त्रैमासमा ठूलो ऋण उठाउन लागेको हो । सरकारले चालु आर्थिक वर्षको दोस्रो त्रैमासमा उठाउने भनिएको आन्तरिक ऋण पनि पहिलो त्रैमासमा सारेको छ ।
बजेटमार्फत सरकारले चालु आर्थिक वर्षको दोस्रो त्रैमासमा ५५ अर्ब रुपैयाँ आन्तरिक ऋण उठाउने भनेको थियो । तर, खर्च धान्नै मुस्किल पर्ने अवस्था देखिएपछि सरकारले दोस्रो त्रैमासमा उठाउने भनिएको आन्तरिक ऋणमार्फत २५ अर्ब ऋण पहिलो त्रैमासमै उठाउन लागेको हो । योसँगै अब सरकारले दोस्रो त्रैमासमा ३० अर्ब मात्रै आन्तरिक ऋण उठाउनेछ ।
