• अर्थ सरोकार सम्बाददाता 

काठमाडौँ – नेपालमा अहिलेसम्म बैंकास्योरेन्स’को कुनै कानुननै बनेको छैन । तर विभिन्न बीमा कम्पनीहरुले हामीले फलानो कम्पनीसँग बैंकास्योरेन्स’ गर्यौं भन्दै हौवा पिटिरहेका छन् भन्ने खबर अर्थ सरोकार डटकमले सार्वजनिक गरेपछि धेरै कम्पनीहरुले आफुले पठाउने प्रेस रिलिजहरुमा बैंकास्योरेन्स’ शब्द हटाउन थालेका छन् । थोरैले मात्र बुझेको यो कुरालाई धेरैले सुधारेका छन् । धेरै कम्पनीले आफुले पनि बुझ्नमा गल्ती भएको भन्दै हुँदै नाबह्येको बैंकास्योरेन्स’ को हौवा पिटाउन छाडिसकेका छन् । तर पछिल्लो समय विभिन्न कारणले विवादमा आएको इन्स्योरेन्स कम्पनी रिलायबल नेपाल लाइफ इन्स्योरेन्सले भने विभिन्न बैंकहरुको नाम नै वेव साइटमा राखेर आफुले विभिन्न बैंकहरुसँग बैंकास्योरेन्स गरेको भन्दै हौवा पिटाइरहेको छ । अझ कतिपय अवस्थामा यहि कुरालाई प्रचार गरेर कम्पनीले झुटको खेती पनि गरिरहेको छ । 

अहँ ! अहिलेसम्म छैन नेपालमा बैंकास्योरेन्सको कानुन !

हो ! अहिलेसम्म नेपालमा यसका लागि कानुन नै बनेको छैन । बैंकहरुलाई बीमा समितिले संस्थागत एजेन्टको रुपमा काम गर्न मात्रै अनुमति दिएको छ । बैंकले गर्ने पनि त्यहि हो । बैंकमार्फत बीमा पोलिसी विक्री गर्ने सम्झौता गरिएको हो कुनै बीमा कम्पनीसँग । बैंक धेरै ठाउँमा पुग्न सक्ने हुनाले यस्तो सम्झौता हुने गरेको छ । तर यो कुनै पनि हालतमा ‘बैंकास्योरेन्स’ होइन । अहिले भइरहेको सम्झौता भनेको बैंकहरुले संस्थागत एजेन्टको लाइसेन्स लिएका हुन्छन् र विभिन्न बीमा कम्पनीहरुको पोलिसी बेच्ने कामको सम्झौता भएको हो । यस्तो सम्झौतापछि सम्झौता भएका बैंकले सम्झौता भएका बीमा कम्पनीहरुको पोलिसी आफ्ना ग्राहकहरुलाई बेच्ने गरेका छन् । यसले बैंक र बीमा कम्पनी दुबैलाई सजिलो हुने विश्वास दुवै पक्षले गर्छन् । तर यो ‘बैंकास्योरेन्स’ होइन । यी बैंकहरुले ‘बैंकास्योरेन्स’का लागि कुनै पनि इजाजत लिएका छैनन् । कतिले नबुझेर, कतिले नजानेर, कतिले कम ज्ञान भएर त कतिले बढी जान्ने भएर यस्तो सम्झौतालाई ‘बैंकास्योरेन्स’ भनिरहेका छन् । तर यो तथ्य बाहिर आइसकेपछी पनि रिलायबल नेपाल लाइफ इन्स्योरेन्सले भने मनपरी ढंगले विभिन्न बैंकहरुको लोगो नै राखेर ठुलै प्रगति गरेजसरी बैंकास्योरेन्सको हौवा पिटाउने काम गरेको छ । 

यो पनि पढ्नुहोस् :

• अर्थ सरोकार समाचार प्रभाव : आइएमइ जनरल इन्स्योरेन्स लगायतका कम्पनीको चेत खुल्यो, सच्याइयो ‘ब्लन्डर’ !

• EXCLUSIVE : कानुनमै नभएको ‘बैंकास्योरेन्स’को हौवा पिटाउँदै बैंक र बीमा कम्पनीहरु, यस्तो छ भित्री यथार्थ !

के भन्छ बीमा समिति ?

यस विषयमा बुझ्न हामीले बीमा समितिमा सम्पर्क गरेका थियौं । बीमा समितिका कार्यकारी निर्देशक राजुरमन पौडेलका अनुसार बैंकसँग संस्थागत अभिकर्ताको सम्झौता गरेर त्यसलाई बैंकास्योरेन्स भनी प्रचार गर्न नमिल्ने वा त्यसलाई ‘बैंकास्योरेन्स’ भन्नै नमिल्ने दावी गर्छन् । ‘अहिलेसम्म नेपालमा ‘बैंकास्योरेन्स’को इजाजत कसैलाई पनि छैन । त्यससम्बन्धि कानुन पनि अझैसम्म प्रचलनमा छैन । नबुझेर सबैले ‘बैंकास्योरेन्स’ भनी प्रचार प्रसार गरिएको पाइएको छ ।’ अर्थ सरोकार डटकमसँग कुराकानी गर्दै उनले भने, ‘बैंकास्योरेन्स भनेको बैंकले नै आफ्ना ऋणी तथा सेवाग्राहीलाईमात्रै लक्षित गरेर ल्याईने छुट्टै सेवा हो । यो प्रचलन नै नेपालमा अहिले छैन । यसका लागि बैंकले छुट्टै लाइसेन्स नै लिनुपर्छ बीमाको नियामकसँग । हाल बैंक र बीमा कम्पनीबीच भएको सम्झौता इन्स्योरेन्स कम्पनीले बैंकलाई प्रदान गरेको संस्थागत एजेन्ट मात्र हो । बरु कुरा के चाहिं हो भने बीमा समितिले बैंकास्योरेन्स सम्बन्धी इजाजत दिनका लागि भर्खरै मात्र सो सम्बन्धी मस्यौदा तयार पारेको छ । यसको मतलव अहिले कानुनमा कुनै पनि व्यवस्था नभएको ‘बैंकास्योरेन्स’को परिकल्पना अव आउने कानुनहरुले गर्नेछन् । उक्त मस्यौदा पारित भएको खण्डमा बीमा समितिले बैंकहरुलाई बैंकास्योरेन्सको ईजाजत दिन सक्छ । तर अहिले बीमा समितिले नै इजाजत दिन मिल्नेगरी कानुन नभएको अवस्थामा बैंकहरुले भने हामीले ‘बैंकास्योरेन्स’ गर्यौं भनेर हौवा पिटाइरहेका छन् ।’

यो पनि पढ्नुहोस् 

• गत बर्ष व्यवसायमा छलाङ मारेको रिलायब नेपाल लाइफमा ‘विकृति’ भित्रियो, फोर्स मर्जरको हल्लाभित्रको यथार्थ के हो ?

कम्पनीका कर्मचारी भन्छन्, ‘थाहा छैन’

यस विषयमा बुझ्न हामीले रिलायबल नेपाल लाइफ इन्स्योरेन्समा पनि फोन गरी सोधेका थियौं । तर कम्पनीका कर्मचारीले यस विषयमा आफुलाई थाहा नभएको बताईन् । साथै उनलाइ यस विषयमा बोल्ने को हुनुहुन्छ ? उहाँलाई फोन ट्रान्सफर गरिदिनुहोस् वा उहाँको फोन नम्बर दिनुहोस् भन्दा यस विषयमा कसले बोल्ने नै आफुलाई थाहा नभएको र कसैको नम्बर पनि दिन नमिल्ने बताईन् ।