काठमाडौँ। लेखा व्यवसायीहरुको नियमनकारी निकाय नेपाल चार्टर्ड एकाउन्टेन्ट्स संस्था (आइक्यान) र बीमा समितिले संयुक्त रुपमा बिहीबार बीमा कम्पनीहरुका विभिन्न मुद्धाहरुबारे अन्तरक्रिया कार्यक्रम राखेको थियो । सो कार्यक्रममा बीमा समितिका अध्यक्ष, आइक्यानका अध्यक्षमात्र होइन सबैजसो बीमा कम्पनीका प्रतिनिधिहरुको उपस्थिति थियो । कार्यक्रममा विभिन्न विषयमा अन्तरक्रिया पनि भयो । विशेषगरी बीमा कम्पनीको पूँजीवृद्धि, बीमाको लेखापरीक्षण, बीमामा आइक्यानको भूमिका र कम्पनीमा लेखापरिक्षकको दायित्व लगायत विविध विषयमा अन्तरक्रिया भएको सो कार्यक्रमको अन्तिममा प्रश्नोत्तर सेसन पनि थियो ।
सो सेसनमा उपस्थितहरुले विभिन्न खालका प्रश्न राखेका थिए भने आइक्यानका अध्यक्ष, जीवन बीमक संघका अध्यक्ष, बीमा समितिका सहायक निर्देशक लगायतले आएका प्रश्नहरुको उत्तर दिएका थिए । तर प्रश्नोत्तरकै बीचमा आइक्यानका पूर्व अध्यक्षसमेत रहेका र पुनर्बीमा कम्पनीमा समेत काम गरेका महेश गुरागाईंले उठाएको प्रश्नमा उल्लेख भएको शब्दलाई लिएर भने बीमा समितिले आपत्ति नै जनाएको छ ।
प्रश्न गर्ने क्रममा महेश गुरागाईंले ‘सर्भेयरहरु आतंककारी जस्ता भए, बुझ्दै नबुझी दायित्वबारे रिपोर्ट लेखे, सर्भेयर आतंक बढी भयो, यसमा बीमा समिति के हेरेर बसेको छ ?’ भन्दै प्रश्न गरेका थिए । प्रश्नपछि बीमा समितिका सहायक निर्देशक सुशील देव सुबेदीले ‘आतंक’ भन्ने शब्दमाथि आफ्नो आपत्ति रहेको बताएका थिए । ‘तपाईंले जुन सर्भेयरको आतंक’ भन्ने शब्द प्रयोग गर्नुभयो, त्यसमा मेरो सविनय आपत्ति छ ।’ गुरागाईंको प्रश्नको उत्तर दिंदै सुवेदीले भने, ‘सर्भेयरहरु आतंककारी होइनन् । उनीहरुलाई त्यसरी लिईनु हुँदैन ।’
गलत गर्ने सर्भेयरलाई कारवाहीसमेत गरिएको बताउँदै उनले ठगी गर्ने, वा गलत गर्ने जो कोहि सर्भेयरलाई बिगतमा पनि बीमा समितिले कारवाहीको दायरामा ल्याएको र अव पनि ल्याउने स्पष्ट पारे । सर्भेयर नै नभई सर्भेयरको काम गर्नेहरु बढे भन्ने विषयमा उठेको प्रश्नमा उनले त्यस्तो काम गर्नेलाई बिगतमा पनि कारवाही गरिएको र अव पनि गरिने स्पष्ट पारेका छन् । ‘हामीले गलत गर्नेलाई कारवाही हिजो पनि गरेका थियौं, र आज पनि गर्छौँ ।’ कार्यक्रममा बोल्दै उनले भने, ‘नियामकले नियामकीय भूमिका खेल्न जानेको छ र खेल्छ।’
कार्यक्रममा गुरागाईंले बीमा समितिमा एक्चुरी को छ ? भनेरसमेत प्रश्न गरेका थिए । जवाफमा सुवेदीले बीमा समितिमा भएका एक्चुरीहरुको विवरण सुनाएपछि गुरागाईं चुप बसेका थिए । गुरागाईं केहि समय अगाडी बीमा समितिको समेत दौडमा थिए । तर उनी सफल हुन सकेका थिएनन् ।
अर्का एक सहभागीले लेखापरिक्षकले परिक्षण गरेको रिपोर्ट फेरि किन बीमा समितिले हेर्छ ? भनेर सोधेको प्रश्नमा पनि सुवेदीले नियामकको काम नै त्यहि भएको स्पष्ट पारे । ‘जहाँसम्म अडिटरले हेरेको रिपोर्ट फेरी बीमा समितिले हेर्नुपर्छ र ? भन्ने प्रश्न उठेको छ, त्यो पर्छ । हामी हेर्छौँ । अन्य देशहरुमा पनि हेरिने चलन छ । नियामकको काम नै हेर्ने हो, उसले हेर्छ।’ उनले भने । अर्को एक प्रसङ्गमा अडिटरले अडिट रिपोर्ट क्वालिफाई गरेको खण्डमा लाभांश रोक्नु पर्ने विषयमा उठेको आवाजप्रति समितिको ध्यानाकर्षण भएको सुवेदीको भनाई छ।
