काठमाण्डौं । पछिल्लो समय सबैभन्दा बढी हिनामिना र घोटाला प्रकरणमा जोडिएको र बचतकर्ताहरुको रकम हिनामिनामा देशकै सबैभन्दा अगाडी रहेको आरम्भ चौतारी लघुवित्त वित्तीय संस्थाका अर्का पूर्व मेनेजर पक्राउ परेका छन् । अनियमितामा संलग्न भएको आरोपमा लघुवित्तका ओखलढुङ्गा शाखाका पूर्व शाखा प्रमुख ज्ञानेन्द्र सापकोटा पक्राउ परेका हुन् ।
गत २०७९ फागुन १५ गते तत्कालीन शाखा प्रमुख ज्ञानेन्द्र सापकोटाले लघुवित्तका विभिन्न समूहका २५७ सदस्यहरुको किर्ते तमसुक बनाएको खुलेको थियो । यसरी किर्ते तमसुक बनाएर नक्कली कागजात खडा गरेर उनले करिव ३ करोड ८४ लाख ३९ हजार ३ सय ६० रुपैया हिनामिना गरेका थिए । आफ्नो पोल खुलेपछि उनी फरार रहेका थिए । अन्तत: उनी पक्राउ परेका छन् ।
बचतकर्ताको पैसा हिनामिना गरेर उनी लुकेर बसेका थिए । उनले सदस्यको पैसा चलाएको स्वीकारेका छन् । यद्यपी संस्थाले भनेजसरी वा भनेजति पैसा भने नचलाएको उनको तर्क छ ।
यसअघि नक्कली ऋणी खडा गरी ८ करोड बढी रकम अपचल गरेको भन्दै सोहि लघुवित्त वित्तीय संस्थाका मेनेजर विवश पाण्डेलाई पक्राउ गरेको थियो ।
