अहिले एक तोला सुनको गहना खरिद गर्दा ५ देखि १० लाल जर्ती काट्ने गरिएको छ । यसको अर्थ सुन किन्ने ग्राहकले काटिएको जर्तीबराबरको रकमको शुल्क छुट्टै थप्नुपर्छ वा जर्ती काटिएको कम तौलको सुन लैजानुपर्छ । सुनलाई कुँदेर गहना बनाउने क्रममा केहि टुक्रा नास भएर जाने सुनलाई जर्ती भनिने गरिन्छ ।
ऋद्धिसिद्धि ज्वेलर्सले यस्तो सुरुवात गरेपछि केहि व्यवसायीले यसको विरोध गरेका छन् भने केहिले भने ऋद्धिसिद्धिले चालेको कदम उसको मर्जीको विषय भएको दाबी गरेका छन् । विश्वभर पनि जर्ती नलिने, बरु ज्यालामात्र लिने चलन भएको भन्दै ऋद्धिसिद्धिले जर्ती नकाट्ने निर्णय गरेको हो । थाइल्याण्ड, दुवई लगायतका ठाउँमा पनि सुन किन्दा ज्यालाको मात्र अतिरिक्त शुल्क लिने गरिएको छ । नेपालमा लामो समयदेखि जर्तीका नाममा शुल्क लिने गरिएको छ । कतिपय सुनचाँदी पसलले भने अघोषित रुपमा यसमा केहि छुट दिँदै आएका थिए । सुनचाँदी व्यवसायीहरुले १०० भन्दा बढी प्रकारका गहनामा जर्ती कटाउने गरेका छन् ।
गहना बनाउँदा कुन परिमाणमा सुन नास हुन्छ भन्ने कुनै पनि एकिन आधार छैन । यहि मौकाको फाइदा उठाएर नेपाली सुनचाँदी व्यवसायीहरुले आफुखुसी जर्ती कटाएर ग्राहकलाई पैसा थप्न लगाउने वा कम तौलको सुन लैजान लगाउने गरेका छन् । ऋद्धिसिद्धि ज्वेलर्सले पनि यसअघि जर्ती काट्ने गरेको थियो । तर अव भने ऋद्धिसिद्धिले सुन बेच्दा जर्ती नकाटी ज्यालामात्र काट्ने भएको छ ।
