माघे सङ्क्रान्ति नजिकिँदै गर्दा मध्यपुरथिमि नगरपालिका– १२ दुईपोखरी ‘इनाय’ टोलका उत्तमराज श्रेष्ठलाई चाकु बनाउन भ्याइनभ्याई भएको छ ।

मध्यपुरथिमिमा ५० वर्षअघि बाबु गणेशप्रसाद श्रेष्ठले सुरु गरेको चाँकु बनाउने पेसा धान्दैआउनु भएको उत्तमराजको परिवारलाई एकमहिना अघिदेखि चाकु बनाउन भ्याइनभ्याई भएको हो । वर्षभरि नै चाकु बनाउने भए पनि अहिले माघे सङ्क्रान्ति र जाडोका कारण मागलाई धान्न उहाँलाई धौधौ परेको छ ।

वैशाख जेठको गर्मीमा दैनिक सात किलोदेखि १० किलो, असोज कात्तिकमा दैनिक १५ किलोदेखि २० किलो चाकु बेच्दै आउनु भएका उहाँले पुस लागेपछि भने दैनिक ५० किलोभन्दा बढी बिक्री गरिरहनु भएको छ । “माघे सङ्क्रान्तिमा ३०० किलोदेखि ५०० किलोसम्म चाकु बिक्री हुन्छ” उनले भने ।

सख्खर, नरिवल, छोगडा, दूध, कुराउनी, र विभिन्न मसलाको प्रयोग गरेर बनाइने यहाँको चाकु किन्न भक्तपुर, काठमाडाँै, ललितपुर, साँखु, पनौती र उपत्यका बाहिरबाटसमेत आउँछन् । यहाँको चाकु प्रख्यात भएकै कारण स्वदेश तथा विदेशमा समेत उपहार दिन तथा सुत्केरीलाई खुवाउन टाढाटाढादेखि लिन आउने गरेका छन् ।

अघिल्लो वर्ष प्रतिकिलो रु ३०० मा बिक्री गरेको चाकु यसवर्ष प्रतिकिलो रु ५० मूल्य वृद्धि भएको छ । ग्यासको अभावले दाउरामा चाकु उत्पादन गर्न कठिन भएका कारण मूल्य वृद्धि भएको हो । श्रेष्ठ परिवार चाकु बनाउन व्यस्त रहेको छ । उनीहरूले आफन्तलाई समेत सघाउन बोलाएका छन् ।

बाजेले सुरु गरेको चाकु व्यवसायमा बाबुलाई साथ दिँदै आउनु भएका सुदिप मनग्य आम्दानी हुने भएकाले यो पेसालाई आफूले पनि निरन्तरता दिने बताउनुहुन्छ ।