• अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले कोदो टिप्ने चटारोमा कृषकदेखि देशभर अरु कहाँ-के भयोसम्मका दृश्यलाई फोटो समाचारमा समेटेका छौं । 

पोखरा–१७ घारीपाटनस्थित म्यूजियम मार्गमा भौतिक दूरी कायम गरी कोदो टिप्दै कृषक । कुनै समयमा दुःखको खाना कोदोको परिकार यतिखेर भने सोखको खाना बनेको छ ।

पाल्पाको तानसेन नगरपालिकाको टक्सार टोलमा झिनिया रोटी रोजेर राख्दै व्यावसायी । दशैं तिहारमा पाल्पाली झिनिय रोटीको व्यापार राम्रो हुँदै आएको छ । 

मौरीपालनबारे कृषकलाई जानकारी दिँदै भोजपुरको पौवादुङमा गाउँपालिकाका कृषि शाखा प्रमुख बर्तेन्द्र राई । गाउँपालिका स्थापनापछि पहिलो वर्ष २५० वटा, दोस्रो वर्ष ६० आधुनिक घार र यस वर्ष ५० घार कृषकलाई वितरण गरेको कार्यालयले जानकारी दिएको छ । 

जापानबाट फर्केर बागलुङ नगरपालिका–३ कृषि गाउँमा कुखुरापालन गर्दै आउनुभएका इन्द्र केसीको जिम्माल कुखुरा फर्ममा कुखुराको स्याहार गर्दै श्रमिक । 

पाल्पाको रैनादेवी छहरा गाउँपालिकाको मुझुङ्गमा सामूहिकरुपमा टपरी बनाउँदै महिलाहरु । जन्म, मृत्यु र बिवाह संस्कारमा हुने भोज भतेरमा टपरीमा खाना खाने चलन छ ।

जाजरकोटको नलगाड नगरपालिका कृषि शाखाले भोटेगरी महिला कृषक समूहलाई तोरीको बीउ वितरण गर्दै ।

पोखराको सराङ्कोटबाट प्याराग्लाइडिङमार्फत आकाशमा उड्ने तयारी गर्दै पर्यटक । कम्पनीले सस्तो प्याकेज उपलब्ध गराएपछि खुलेको मौसममा पोखरामा अहिले प्याराग्लाइडिङ गर्ने पर्यटकको सङ्ख्या बढेको छ ।

लालझाडी गाँउपालिका –३ का किसान बाख्रा चराउन सामुदायिक वनमा लैजाँदै । व्यावसायिक रुपमा बाख्रापालन गरेर यहाँका महिलाले घरायसी खर्च चलाउँदै आएका छन ।