बैठकमा प्रधानमन्त्री सुशील कोइरालाले राजिनामा नगर्ने तर नयाँं सरकार गठनका लागि आह्वान गर्न राष्ट्रपतिलाई आग्रह गर्ने बताएपछि एमाले मन्त्रीहरुले आपत्ति प्रकट गरेका थिए ।
मन्त्रिपरिषद् स्रोतका अनुसार प्रधानमन्त्रीले आजै संसदलाई संवोधन गर्ने,त्यसक्रममा नयाँं सरकार गठनको प्रक्रिया आरम्भ गर्न अनुरोध गर्ने र आजै राष्ट्रपतिलाई पनि भेटेर प्रक्रिया आरम्भ गर्न आग्रह गर्ने बताएका थिए । तर एमाले मन्त्रीहरुले भने तीन दलको सहमति र संविधानको व्यवस्था अनुसार राजिनामा गर्नु उचित हुने बताए ।
यसैवीच बन मन्त्री महेश आचार्यले राजिनामा गर्नु पर्ने वा गर्न नहुने भन्ने विषयमा मन्त्रीहरुले बोल्न नमिल्ने र यो प्रधानमन्त्रीको स्वविवेक र आवश्यकता अनुसार निर्णय गर्ने विषय हो भनेर बोलेका थिए । आचार्यको यो भनाइप्रति चर्को आपत्ति गर्दै उद्योग मन्त्री महेश बस्नेतले संविधानको व्यवस्था अनुसार राजिनामा गर्नु पर्ने विषय भन्न किन नहुने भन्दै प्रश्न गरे । स्रोतका अनुसार मन्त्री बस्नेतले भने–एमाले मन्त्रीहरुलाई हटाउन मिल्छ भने संविधानको व्यवस्था अनुसार प्रधानमन्त्रीले राजिनामा गर्नु उचित हने भन्न किन नहुने ?
एमालेका अन्य मन्त्रीहरुले पनि प्रधानमन्त्रीले राजिनामा गरेर संविधान कार्यान्वयन र तीन दलीय सहमतिको पक्षमा उभिनु पर्ने बताएका थिए । कांग्रेसका मन्त्रीहरुले राजिनामा गर्न आवश्यक नभएको र नयाँं सरकार गठनको प्रक्रिया आरम्भ गर्नु पर्ने बताएका थिए । यसक्रममा केहीवेर चर्काचर्की जस्तै भएको थियो । मन्त्रिपरिषदको बैठकपछि एमाले मन्त्रीहरु बाहिरिएका थिए । बैठकको अन्त्यमा प्रधानमन्त्रीले यो विषयमा मन्त्रिपरिषद्को भावना र दलहरुसँंग परामर्श गरेर निर्णय गर्ने बताएका थिए ।
प्रधानमन्त्रीले विशेष रुचाएका कांग्रेसका मन्त्री भने धेरैवेर मन्त्रिपरिषद कार्यालयमै बसेका थिए । कानुन मन्त्री नरहरि आचार्य र सञ्चार मन्त्री डा.मिनेन्द्र रिजालले प्रधानमन्त्रीलाई राजिनामा नगर्न दवाव दिएको स्रोतको दावी छ ।
