नेपाल आयल निगमले बुधबारबाट निजी कार, जिप, भ्यानलाई पेट्रोल वितरण गर्ने भएको छ । एक सातायता इन्धनको आयात तथा मौज्दात बढेका कारण निजी सवारीसाधनलाई पेट्रोल बाँड्ने निर्णय भएको प्रवक्ता मुुकुन्द घिमिरेले जानकारी दिए । निगमका अनुसार यसपटक पनि दर्ता नम्बर (लट) का आधारमा निजी चारपांग्रे सवारीसाधनले पेट्रोल पाउनेछन् । ‘पुस २२, २४ र २७ गरी तीन दिन पेट्रोल वितरण गर्ने निर्णय भएको छ,’ उनले भने । घिमिरेका अनुसार २२ पुसमा १–६ लट, २४ पुसमा ७–१० लट र २७ पुसमा ११ लट र सोभन्दा माथिका कार, जिप, भ्यानले पेट्रोल पाउनेछन् ।
पेट्रोल भर्नका लागि नवीकरण गरेको बिलबुक साथमै लैजानुपर्नेछ । उपत्यकाका कुन–कुन पम्पबाट इन्धन दिने भन्ने सूचना अघिल्लो दिन नै सार्वजनिक गर्ने निगमले जनाएको छ । प्रत्येक सवारीलाई १५ लिटरका दरले पेट्रोल वितरण गर्ने निगमले जनाएको छ । त्यसका लागि तीन दिनमा करिब १३ लाख लिटर पेट्रोल वितरण गरिनेछ । यसअघि निजी मोटरसाइकल र स्कुटरलाई इन्धन वितरण गरिएको थियो । निजी कार, जिप, भ्यानले तिहारपछि इन्धन पाएका छैनन् ।
यसपटक चारपांग्रे सवारीसाधनलाई लाइन नबसी तेल भर्ने वातावरण मिलाउन एसएमएस प्रणाली लागू गर्ने तयारी भइरहेको प्रवक्ता घिमिरेले बताए । ‘हामीले एसएमएस प्रणालीबाट इन्धन भर्न सक्ने वातावरण मिलाउनेबारे छलफल गर्दै छौँ,’ उनले भने, ‘एक/दुई दिनमा निर्णय होला ।’
निगमले ११ मंसिरयता अत्यावश्यक क्षेत्रका सवारीसाधनलाई मात्रै इन्धन वितरण गर्दै आएको छ । अस्पताल, औषधि, दमकल, शवबाहन, फाहोरमैला, अत्यावश्यक खाद्य वस्तु, दूध, पानी र तरकारी ढुवानीका साधन अत्यावश्यकमा पर्छन् । त्यस्तै, कूटनीतिक नियोग, राजदूतावास, स्कुल बस, लामो तथा छोटो रुट र स्थानीय रुटका सार्वजनिक बस, पर्यटक बस, निर्माण सामग्री ओसार्ने ट्रिपर, ट्रक, सरकारी तथा सञ्चार गृहका सवारीसाधनले पनि कोटा प्रणालीमा इन्धन पाइरहेका छन् ।
प्रहरीले ज्येष्ठ नागरिक र अपांगता भएकालाई तेल दिने प्रहरीले ज्येष्ठ नागरिक र अपांगता भएका व्यक्तिलाई आफ्नै पम्पबाट इन्धन दिने भएको छ । प्रत्येक सोमबार प्रहरीको नक्सालस्थित पम्पबाट अपांगता भएका व्यक्तिलाई र सामाखुसीस्थित महालक्ष्मी पम्पबाट ७० वर्ष उमेर नाघेका ज्येष्ठ नागरिकलाई इन्धन उपलब्ध गराउने प्रहरी प्रवक्ता कमलसिंह बमले जानकारी दिए ।
‘ज्येष्ठ नागरिक र अपांगता भएका व्यक्तिलाई इन्धन भर्न सजिलो होस् भन्ने हिसाबले हामीले सातामा एकपटक आफ्नै पम्पबाट इन्धन दिने निर्णय गरेका हौँ,’ उनले भने । ज्येष्ठ नागरिकले उमेर खुल्ने प्रमाणपत्रका साथमा सवारीचालक अनुमतिपत्र (लाइसेन्स) लिएर जानुपर्ने उनले बताए ।
‘अपांगता भएका व्यक्तिबारे त हेरेरै सजिलै थाहा पाउन सकिन्छ,’ उनले भने । चारपांग्रे र दुईपांग्रे दुवै सवारीसाधन लिएर आउने ज्येष्ठ नागरिक र अपांगता भएका व्यक्तिलाई इन्धन दिने उनले जानकारी दिए । तर, एकपटकमा कति परिमाण इन्धन दिने भन्ने यकिन नभएको उनले बताए । ‘आवश्यकताअनुसार र हप्ताभरि पुग्ने तेल दिन सकिन्छ,’ उनले भने ।
