कुमारी बैंकका कर्मचारीसमेत अहिले बैंकमा काम गर्ने वातावरण नरहेको स्वीकार्छन् । ‘काम गर्ने वातावरण नै छैन । मात्र सीइओ र डेपुटी सीइओमध्ये को कसको पक्षमा भन्ने मात्र सल्लाह हुन थालेको छ बैंकमा ।’ बैंकको हेड अफिसमा कार्यरत एक कर्मचारीले अर्थ सरोकारसँग भने, ‘न अहिले बैंकको ग्रोथका बारेमा कुरा हुन्छ, न डिपोजिटको न लोनको । तत्कालीन कुमारीका कर्मचारीहरु तत्कालीन एनसीसीका कर्मचारीले ल्याएको फाइल हेर्नै डराईरहेको अवस्था छ । तत्कालीन कुमारीका कर्मचारीले ल्याएको फाइल तत्कालीन कुमारीकैले हेर्दा फेरी एनसीसीवालाहरु शशंकित हुने र एनसीसीको हकमा पनि यस्तै हुने देखिएको छ । यस्तै हो भने बैंकको उँधोगति सुरु हुन्छ ।’

यता तत्कालीन एनसीसी बैंकबाट गएका कर्मचारीहरु पनि कुमारीका पूराना फाइलहरुमा ठुलो समस्या रहेको बताउँछन् । ‘कुमारीका पहिलाका फाइल पनि लफडेदार छन्, काम गर्न ठुलो रिस्क छ । त्यसैले तत्कालीन कुमारीका साथीहरुले ल्याएको फाइल बढी नै हेर्नुपर्ने स्थिति भएको सत्य हो ।’ तत्कालीन एनसीसीबाट आएका एक कर्मचारी भन्छन्, ‘कुमारी बैंकको फाइलहरुको बिगत पनि राम्रो छैन । हामी आत्तिएको र डराएको दुवै सत्य हो ।’

यता कुमारी बैंकका कर्मचारीहरु तत्कालीन एनसीसीबाट आएका धेरै फाइल बिग्रेको सुनाउँछन् । ‘झन्डै १०० करोडको फाइलमा समस्या छ । कतिपय कागजातमै इस्यु छन् । हाम्रो १९ करोडको फ्रड केस देख्ने तत्कालीन एनसीसीका साथीहरुले आफ्नो करोडौंको फाइल बिग्रिएको देखेका छैनन् । सकेसम्म तत्कालीन कुमारीको फाइल हेर्न नपरे हुन्थ्यो भन्ने लाग्नु स्वाभाविक नै हो । एकदम गलत मर्जर भएछ भन्ने तथ्य बुझ्द्दैछौँ ।’

यता बैंकको दुई कित्ते लडाईका कारण बैंकको रिकभरीमा ठुलो समस्या देखिएको छ । कुमारी बैंकको फाइललाई फलोअप गर्दा क्लाइण्टले एनसीसीका सिइओको नाम लिने अनि एनसीसीका फाइललाई फलोअप गर्दा कुमारीको नाम लिने वा आ-आफ्नो तत्कालीन सीइओको नाम लिने गरेका छन् । कतिपय क्लाइण्टले त पहिला आफ्नो लफडा मिलाउनुस अनि हामीलाई फोन गर्नुहोससमेत भनेका छन् । कर्मचारीहरुलाई नै आफु पहिला जहाँ बैंकको हो, सो बाहेक अरु फाइल खोज्न वा पल्टाउन मानिरहेका छैनन् । रिकभरीमा यतिसम्म समस्या बढेको छ कि रिकभरी विभागमा संयोजनको ठुलो कमी छ ।

यसको प्रभाव गत साउन २१ गते बैंकहरूले बैंकले सार्वजनिक गरेको आर्थिक वर्षको वित्तीय विवरणमा देखिएको छ । वित्तीय विवरण सार्वजनिक भएका २० वाणिज्य बैंकमध्य सबैभन्दा कमजोर वित्तीय विवरण कुमारी बैंकको देखिएको छ । यसले पोष्ट मर्जरमा कुन हदसम्मको लफडा छ भन्ने पुष्टी गरेको छ । ‘एनसीसीको फाइलमा समस्या छ । एउटा झन्डै १०० करोडको फाइलमा समस्या देखिएको छ । ब्याज, किस्ता केहि आएको छैन ।’ तत्कालीन कुमारी बैंकका कर्मचारीले यसो भन्दा तत्कालीन एनसीसी बैंकका कर्मचारी भन्छन्- ‘कुमारीका धेरै फाइलमा समस्या देखिएका छन् । अनेक बहानामा ऋणको ब्याज र किस्ता तिरिएका छैनन् । जसको प्रभाव बैंकको वित्तीय विवरणमा देखिनु स्वाभाविक हो ।

मर्जरपछि एक बनेको कुमारी बैंकले ठेकेदारहरूसँगमात्रै ३ अर्ब कर्जा उठाउन बाँकी छ । यसको सावाँको त कुरै छोडौं, ब्याजसमेत आएको छैन । बैंकभित्र काम गर्ने वातावरण नबन्दा बैंकको विवरणयोग्य नाफा नै नेगेटिभ भएको छ । ‘एउटा सहकारीलाई १०० करोड ऋण दिएको समेत पाइयो । सोहि कारण पनि बैंकको वित्तीय विवरणमा समस्या देखियो ।’ बैंकका एक उच्च अधिकारीले अर्थ सरोकारसँग भने, ‘बैंकको निस्क्रिय कर्जा बढेको छम  ५ अर्बबढी रुपैयाँ प्रोभिजनिङ गरिएको छ । काम गर्ने वातावरण नै छैन, बैंकको प्रगति कसरी हुन्छ ?’ पछिल्लो विवरण हेर्दा बैंकको वितरणयोग्य नाफा ८४ करोड ८३ लाख ऋणात्मक देखिएको छ । कर्मचारीको झगडा समयमा नै नसल्टिने हो भने यो समस्या झन् झन् बढ्दै जाने स्वयम् कर्मचारीहरुको गुनासो छ ।

बैंकका सीइओ भन्छन्- ‘धेरै कुरा इगोले बिगारेको छ, विस्तारै सबै ठिक हुन्छ’